DILI, 12 agostu 2024 (TATOLI)—IX Governu Konstitusionál liuhusi reuniaun Komité Revizaun Polítiku, segunda ne’e, hahú analiza programa no proposta orsamentál husi ministériu no ajénsia outonómu sira hodi elabora projetu finál proposta-lei Orsamentu Jerál Orsamentu (OJE) 2025.
Reuniaun ne’ebé prezide husi Primeiru-Ministru, Kay Rala Xanana Gusmão ne’e sei hala’o hahú loron 12 to’o 27 agostu 2024.
Antes ne’e, Konsellu Ministru iha loron 17 jullu 2024, delibera hodi aprova montante totál despeza ne’ebé relasiona ho títulu orsamentál ida-idak kona-ba OJE 2025, ho valór globál $1.800.000.000, ne’ebé montante ne’e fahe ba orsamentu ba Administrasaun Sentrál, Seguransa Sosiál no Rejiaun Administrativa Espesiál Oé-cusse Ambeno (RAEOA).
Despeza totál ne’e fahe ba Administrasaun Sentrál $1.758.791.150 (inklui despeza ba Seguransa Sosiál no kapitál dezenvolvimentu), RAEOA $41.208.850, enkuantu Finansiamentu Petrolíferu $1.241.034.995, Finansiamentu Naun Petrolíferu $558.965.005, dívida públika $297.132.365, ne’ebé dívida públika reprezenta 14,41 husi Produtu Internu Brutu (PIB).
Komité Revizaun Polítiku iha responsabilidade atu verifika alokasaun rekursu estratéjiku iha submisaun orsamentál ho objetivu atu alkansa kompromisu no objetivu sira ne’ebé hatuur iha dokumentu estratéjiku sira no avalia viabilidade planu ba tinan finanseiru 2025.
Komité Revizaun Polítiku kompostu mós husi Vise-Primeiru-Ministru na’in-rua, Ministra Finansa, Ministru Obras Públika no Ministru Planeamentu no Investimentu Estratéjiku.
Observadór iha reuniaun ne’e mak hanesan Sekretária Estadu Igualdade no Inkluzaun, Prezidente Institutu ba Defeza Direitu Labarik no reprezentante ida husi Asosiasaun Defisiente Timor-Leste.
Jornalista : Osória Marques
Editora : Julia Chatarina
