DILI, 13 agostu 2024 (TATOLI)– Diretór Empreza NOGA Holdings Austrália, Agnus Karoll, tersa ne’e, hasoru malu ho Prezidente Repúblika, José Ramos Horta, hodi hato’o sira nia interese atu investe iha Timor-Leste liuliu iha área petróleu.
“Ha’u mai hasoru Prezidente Repúblika ami ko’alia kona-ba investimentu, tanba ami hakarak investe liután iha Timor-Leste, iha koordenasaun ho órgaun relevante sira iha Timor-Leste no servisu hamutuk ho autoridade Nasional Petróleu (ANP), Ministru Petróleu no Rekursu Mineral (MPRM), Timor GAP ho objetivu atu emprega timoroan sira iha Timor-Leste no mós bele fó taxa ba Estadu,” Diretór ne’e hateten ba jornalista sira hafoin ramata enkontru ho xefe Estadu.
Durante hasoru malu Empreza ne’e husu ba Prezidente Repúblika atu ko’alia mós ho Governu hodi fó oportuniade ba sira atu halo investimentu petróleu iha nasaun ne’e.
Angus Karoll afirma katak NOGA sei investe iha formasaun ba rekursu umanu timoroan nian no empreza iha intensaun atu hela iha Timor-Leste ba tempu naruk, hodi dezenvolve nia negósiu iha rai-laran no atu fó apoiu ba povu Timor-Leste.
“Timoroan sira sai furak tebes ba australianu sira no hanoin hikas Timor-Leste nia apoiu ba Austrália durante Funu Mundiál Daruak, iha ne’ebé timoroan rihun sanulu resin fó sira-nia vida hodi luta hamutuk ho australianu sira, orgullu tanba bele fó fali buat ruma ba komunidade, servisu hamutuk ho Timor-Leste hodi dezenvolve rekursu umanu no negósiu ho sustentabilidade,” nia dehan.
Rekorda fali katak, iha loron 28 fulan-setembru tinan 2017 empreza Noga Holdings, nia aviaun semo ona mai iha Aeroportu Internasionál FALINTIL Kay Rala Xanana Gusmão, iha Suai husi Darwin, Austrália.
Ligasaun aéreu entre Darwin no Suai opera husi Northern Oil & Gas Australia (NOGA) ba operasaun transporte rekursu umanu ba plataforma petrolíferu sira iha Tasi Timor, hodi permite empreza harii nia baze operasaun iha Suai, ne’ebé sei promove dezenvolvimentu ekonómiku husi rejiaun.
Pasajeiru dahuluk sira, Angus Karoll, Diretór Jerál NOGA nian no John McDermott, Prezidente Aviasaun McDermott nian, empreza ne’ebé opera transporte elikópteru nian husi aeroportu ba plataforma petrolífera sira, no sira nia delegasaun voo dahuluk ne’e simu kedan husi Governu Timor-Leste.
Voo NOGA ne’e la’ós voo komersiál, maibé ligasaun aérea atu fasilita operasaun kompañia nian iha Tasi Timor no atu transporta ninia traballadór sira ne’ebé mai husi Austrália ba Suai no husi ne’ebá ba plataforma petrolífera sira.
Ligasaun aéreu ne’e bele dada mós kompañia aéreu sira seluk hodi hala’o operasaun ba Suai ba transporte regulár, turizmu no objetivu sira seluk.
Jornalista: Hortencio Sanchez
Editór: Florencio Miranda Ximenes
