BAUCAU, 13 agostu 2024 (TATOLI) – Komandu Polísia Nasionál Timor-Leste (PNTL) liuhusi seksaun tránzitu munisípiu Baucau rekolla reseita hamutuk $1.780 ne’ebé mai hosi transporte públiku.
Xefe Seksaun Polísia Tránzitu Baucau, Sarjentu Xefe Alberto M. Piedade Gusmão, esplika, koima referida rekolla ba transporte públiku sira-ne’ebé utiliza reben nune’e tránzitu Baucau ezekuta orientasaun husi Komandu Jerál, hodi pasa revista iha munisípiu Baucau.
“Labele uza vidru metan, tanba sira tula sasán no ema barak ita la haree. Tán ne’e ami halo operasaun vidru reben metan tenke hatún hotu,” Xefe Seksaun Tránzitu PNTL Munisípiu Baucau hateten iha Vila Nova, tersa ne’e.
Seksaun tránzitu Baukau sei kontinua ezekuta orden hodi halo operasaun iha estrada públiku nune’e identifika no hasai reben ne’ebé transporte públiku uza tanba konsideradu bele hamosu asidente tráfegu.
Koima ba infrasaun bazea ba diploma konjunta ministeriál númeru 2 no númeru 3/MTCOP/2003 kona-ba transporte públiku ne’ebé utiliza estrada públiku uza reben ba asesoria transporte vidru nakukun selu koima entre $ 50 to’o $70.
“Ami halo operasaun ba karreta mikrolete no bís ne’ebé reben vidru metan no ami aplika koima, kuandu reben karreta ida $50.00,” Sarjento Xefe Alberto Gusmão akresenta.
Totál transporte públiku ne’ebé parte polísia tránzitu Baukau identifika uza reben no asesoria iha vidru nakukun hamutuk karreta públiku 37 kompostu hosi mikrolete 35 no bís rua.
Jornalista : Natalino Belo
Editór : Evaristo Soares Martins
