Estadus Unidus ho MCI lansa sentru inkubasaun negósiu
DILI, 16 agostu 2024 (TATOLI) – Embaixadora Estadus Unidus ba Timor-Leste hamutuk ho Ministériu Komérsiu no Indústria halo lansamentu ba sentru inkubasaun negósiu iha Institutu of Business (IOB) ne’ebé atu hatán ba nesesidade krítiku investimentu nian ba inisiativa empregu no empreendedorizmu ba feto no juventude sira iha Timor-Leste.
“Sentru Inkubasaun Negósiu ne’e fornese apoiu ba emprezáriu/a foin-sa’e sira atu bele asesu ba mentoria, formasaun, haluan rede servisu no hetan abilidade sira ne’ebé presiza atu hetan susesu iha merkadu ida ne’ebé kompetitivu”, Embaixadora Donna Ann Welton hateten ba jornalista sira iha Kamouz IOB Pantai Kelapa, ohin.
Nia relata, USAID nia atividade feto no foinsa’e kria futuru hanesan prova ida ba kompromisu atu kapasita joven, feto no ema ho defisiénsia sira iha Timor-Leste, ajuda sira kria oportunidade empregu no lori mudansa pozitivu ba sira-nia komunidade.
“Sentru inkubasaun negósiu WYCF ne’e, sei hasa’e kapasidade emprezáriu/a joven timoroan potensiál sira ho foku ba feto sira, oferese formasaun komprensivu kona-ba abilidade negósiu, orientasaun prátika no mentoria hodi dezenvolve abilidade no koñesimentu ne’ebé nesesáriu ba partisipante sira atu hetan susesu nu’udar emprezáriu iha merkadu atuál ne’ebé kompetitivu.
Nia esplika, Ajénsia Estadus Unidus finansia ba dezenvolvimentu internasionál (USAID), sentru inkubasaun negósiu nu’udar parte ida husi investimentu ho durasaun tinan lima, ho osan millaun $7.5 ne’ebé maka implementa hosi National Cooperative Business Association CLUSA International (NCBA CLUSA) ho kolaborasaun Institute of Business (IOB) Timor-Leste.
Investimentu ne’e ho objetivu atu empodera joven timoroan sira ho abilidade prátika, relevante ba merkadu hodi loke oportunidade empregu no empreendendorizmu, atu kontribui ba nasaun ne’e nia prosperidade.
Iha fatin hanesan, Ministru Komérsiu no Indústria, Filipus Nino Perreira, dehan inisiativa ida- ne’e la’os kona-ba negosiu de’it, maibé sei fó kbiit ba ema joven sira atu kria oportunidade empregu no fó kontribuisaun pozitivu ba sira-nia komunidade no ba diversifikasaun ekonómika.
“Inisiativa ida-ne’e la’os kona-ba negosiu de’it maibé sei fó kbiit ba ema joven sira atu kria oportunidade empregu no fó kontribuisaun pozitivu ba sira-nia komunidade”, nia esplika.
Nia esplika, Timor-Leste ko’alia kona-ba dezenvolvimentu ekonomia no kriasaun ba joven emprendedór tanba Nonu Governu tau ona atensaun ba kriasaun servisu ida-ne’e hodi diversisfika ekonomia, entaun presiza joven ne’ebé mak dinámiku atu bele demostra sira-nia kapasidade negósiu.
“Atu demostra sira-nia kapasidade mak liuhosi formsaun di’ak ida hodi haklean tan sira-nia koñesimentu iha moris negósiu ne’e oinsá tanba ne’e mak ho prezensa husi sentru inkubasaun ida-ne’e hanesan meiu ida atu fasilita ita-nia joven sira estudante sira ne’ebé mak hakarak hahú sira-nia negósiu ne’e rasik”, nia relata.
USAID nia apoiu ba Timor-Leste dezde independénsia, kontribui ona liu millaun $323 iha dezenvolvimentu, hodi haburas dezenvolvimentu inkluzivu no pasífiku ba Timor-Leste ida ne’ebé prósperu liu, saudavel no auto-sufisiente.
Jornalista : Felicidade Ximenes
Editór : Zezito Silva
