BAUCAU, 16 agostu 2024 (TATOLI) – Uma rua sofre estragu totál iha Vila Nova, Suku Tirilolo, postu administrativu Baucau Vila, munisípiu Baucau, tanba inséndiu ne’ebé suspeitadu kauza hosi sirkuitu eletrisidade.
Kazu referidu, kronolojikamente, akontese iha oras 03 lorokraik, loron kinta, 15 fulan-agostu ne’ebé suspeitadu kauza hosi sirkuitu eletrisidade nune’e rezulta uma komunidade rua kompostu uma hela ida no kioske ida inklui sasán hetan estragus totál tanba, ahi husi eletrisidade alastra hodi hamosu ahi-lakan maka’as husi uma-laran.
“Ha’u triste, tanba lakon buat barak, negosiu ne’ebé ha’u halo durante tinan-24 laran ho osan lakon, so’e tiha deit iha minutu ida nia-laran ahi han hotu,” Vítima Julio Aniceto Aparicio hateten iha Vila nova, sesta ne’e.
Alende sasan, ekipamentu uma-laran no sasan fa’an iha kioske, inséndiu ne’e rezulta mós vitíma lakon osan negósiu hamutuk rihun $45 inklui sasan eletróniku hanesan komputadór ida, laptop unidade tolu no televizaun ida.
Mezmu hafoin inséndiu akontese parte Autoridade Protesaun Sívil (APC, sigla Portugés) Munisípiu Baucau direta fó apoia emerjénsia hanesan alimentasaun no naun-alimentadu sira maibe vitíma senti triste tanba lakon uma hela no tenki hela provizóriu ho viziñu.
“Hau husu ba Estadu la barak mós ajuda ha’u para halo uma,” Julio rekomenda.
Xefe Gabineti Risku Dezastre Naturál Munisípiu Baucau, Basilio Amaral, hateten, Autoridade rejista ona kazu inséndiu ne’e no sei kontinua prosesa apoia materiál rekuperasaun ba vítíma husi munisípiu ba nasionál.
“Ita fó apoia emerjénsia ba xefe família tolu, maibé inséndiu afeta ba uma ida entaun ita prosesu uma kain ida-deit tuir Lei protesaun sívil hodi hetan materiál rekuperasaun,” Basilio informa.
Autoridade Protesaun Sívil Munisípiu Baucau sei halo verifikasaun hodi fó apoiu materiál rekuperasaun ba vítima sira no rekomenda atu futuru tenki konstrui uma dook husi lokál risku dezastre hanesan besik tasi, foho-ninin no mota-ninin nune’e evita dezastre naturál sira.
Insendiu referidu rezulta família tolu mak vitíma nune’e apoia emerjénsia ne’ebé ajuda kompostu hahán hanesan, foos kg 25 saka 6, mina bimoli litru rua masa neen, supermie sedaap kaixa neen, Dancow, sardine, biskuat lata no falun, kafe, masin-midar, koto.
Enkuantu apoia emerjénsia la’ós hahan mak hanesan materiál dapur kompostu family kids, balde no basia.
Notísia relevante:Inséndiu iha foho-lolon kontinua akontese tanba falta konxiénsia ema nian
Jornalista : Natalino Belo
Editór : Rafael Ximenes de A. Belo
