Kondisaun estrada iha Abafala difikulta movimentu transporte públiku
BAUCAU, 22 agostu 2024 (TATOLI) – Kondisaun estrada difikulta movimentu transporte husi diresaun suku Abafala ba aldeia Karanu, postu administrativu Quelicai, munisípiu Baucau.
Xefe Suku Abafala Agapito dos Reis, esplika, estrada referida ho distánsia kilómetru tolu ho kondisaun grave nune’e presiza hetan atensaun husi Governu nune’e bele fasilita komunidade transporta produtu lokál ba merkadu.
“Futuru hau sei esforsu, husu ba parte ministériu relevante bele estensaun hanesan orsamentu PNDS nian bele fasilita komunidade-sira,” Xefe suku hateten iha Abafala, kinta ne’e.
Autoridade suku propoin ona orsamentu hosi Programa Nasionál Dezenvolvimentu Suku (PNDS) iha tinan-2023 hatumuk rihun $37-resin hodi halo reabilitasaun ba estrada referida ho distánsia metru 500 maibé seidauk responde preokupasaun komunidade tanba sei nafatin iha kondisaun estragu.
Agapito dos Reis, argumenta, bainhira kondisaun estrada di’ak, sei fasilita mós ba komunidade husi suku viziñu hanesan Guruça, Afaçá no Uaitame hodi asesu.
Komunidade Aldeia Karanu, Tiago dos Reis, hateten, komunidade husi área referida maioria agrikultura, maibé kondisaun estrada difikulta movimentu transporte atu transporta produtu hodi asesu ba merkadu.
“Bainhira iha ema moras ruma, ami hulan de’it foin to’o estrada mak hein ambulánsia lori ba ospitál, maibé tempu udan susar tebes, atu to’o sedu iha estrada, tanba hakuur mota,” Tiago fundamenta.
Suku Abafala rejista populasaun hamutuk 1.329, husi xefe família 329 neebe kompostu aldeia haat hanesan Karanu, Mumana, Assaluki no Tela’a.
Jornalista : Natalino Belo
Editór : Evaristo Soares Martins
