Tránzitu Baucau rekolla reseita rihun tolu-resin durante fulan-agostu
BAUCAU, 23 agostu 2024 (TATOLI) – Komandu Polísia Nasionál Timor-Leste (PNTL) liuhusi seksaun tránzitu munisípiu Baucau rekolla reseita hamutuk rihun $3.595 durante semana-tolu fulan-agostu nian.
Xefi seksaun tránzitu PNTL Baucau, Sarjentu Xefie Alberto M. Piedade Gusmão, esplika, osan hirak-ne’e rekolla liuhosi patrullamentu inklui halo pasarevista ba transporte públiku hanesan mikrolete inklui bís no motorizada.
“Durante semana-tolu, koima hirak-ne’e ami hetan liuhosi transporte sira-ne’ebé dokumentu laiha,” Xefe Seksaun Tránzitu PNTL Munisípiu Baucau hateten iha Vila Nova, sesta ne’e.
Seksaun Tránzitu Baucau fo-sai koima ba motorista sira-ne’ebé kontra sinál tránzitu, la utiliza atributu hanesan kapasete inklui la lori dokumentu transporte hanesan karta kondusaun, inspesaun no lisensamentu.
Alende ne’e, koima ne’ebé rekolla mai husi transporte publiku sira-ne’ebé utiliza vidru metan ne’ebé sei selu multa $50 no $30 ba motorista sira-ne’ebé la utiliza kapasete inklui laiha dokumentu.
PNTL Baucau kontinua halo patrulla ba movimentu transporte sira tanba hakarak kria kondisaun seguru iha dalan públiku nune’e atividade referida sei kontinua to’o loron 30 agostu.
Jornalista : Natalino Belo
Editór : Evaristo Soares Martins
