DILI, 26 agostu 2024 (TATOLI) – Ministru Juventude Desportu Arte no Kultura (MJDAK), Nelyo Isaac Sarmento alerta ba joven hotu tenke partisipa másimu iha selebrasaun tinan 25 konsulta popular 30 Agostu iha ámbitu hakmatek no nakonu ho respeita liuliu ba inan aman sira ne’ebé uluk sakrifika sira nia aan ba auto-determinasaun independensia Timor-Leste nian.
“Iha oportunidade ne’e ha’u apela ba joven sira hotu, imi balun iha tinan 25 ba kotuk seidauk moris, iha balu moris ona maibé sei kiikoan, imi nia inan aman sira ba vota kuidadu tebes imi, sira ba vota iha presaun nia laran, sira ba fó aan ba mate no terus, ikus ita hetan duni ukun rasik aan, iha tempu liberdade ida ne’e tenke respeita imi nia inan aman, respeita sira ne’ebé katuas ferik ona, iha tinan 25 ida ne’e joven hotu tenke partisipa másimu, labele kria violensia ba malu tanba ita mesak timoroan,” Ministru Nelyo hateten ba jornalista sira iha Edifisiu MJDAK Dili, segunda ne’e.
Nia dehan, joven hotu sente liberdade ne’ebé nasaun ne’e hetan ho sofrimentu, joven hotu tenke sente aan hodi hamosu iha ida-idak nia laran katak violensia la’ós solusaun ba rezolve problema.
“Ba joven sira, karik iha problema ruma, di’ak liu buka malu ko’alia didi’ak ba malu, buka oportunidade di’ak ne’ebé Estadu fó hodi apriende tanba nasaun presiza ema hotu nia kontribuisaun,” Ministru ne’e tenik.
Nune’e nia nafatin afirma ba joven sira, karik ladun hatene istoria kona-ba konsulta popular bele hakbesik aan ba inan aman sira, ferik katuas sira atu husu kona-ba saida mak akontese ba sira iha tinan 25 ba kotuk.
Tuir Nelyo, joven tenke hatene istoria atu nune’e bele iha nasionalizmu di’ak ba nasaun no evita konflitu tanba ukun rasik aan ne’ebé Timor-Leste hetan la’ós entrega hosi bandeja.
“Joven sira, besik ba inan aman sira, ferik katuas sira, husu sira konta ba imi istoria konsulta popular nian, durante ne’e sira iha ne’ebé, sira ba vota oionsa, difikuldade saida mak sira hasoru, karik ho difikuldade oioin, joven sira tenke tau ona iha imi nia hanoin, saida mak ita atu hatutan ba oion, kontribui ba nasaun nia di’ak ka ita hanoin mak violensia hela de’it,” Ministru ne’e hakotu.
Selebrasaun konsulta popular ba tinan 2024 Governu liuhusi Primeiru-Ministru Kay Rala Xanana Gusmão orienta ona membru Governu ida-idak atu tun ba Munisipiu no Postu Administrativu sira iha teritoriu nasionál hodi selebra hamutuk ho komunidade rurál sira tanba festa ne’ebé atu realiza festa povu nian.
Jornalista: Hortencio Sanchez
Editór: Florencio Miranda Ximenes
