DILI, 27 agostu 2024 (TATOLI) – Governu liuhusi reuniaun Konsellu Ministru (KM), tersa ne’e, delibera no autoriza despeza, ho valór millaun 16,5, relasiona ho aprovizionamentu ba kontratu prestasaun servisu ho durasaun tempu naruk iha ámbitu kabu Submarinu “fibra ótika” nian, ba períodu tinan 17, husi tinan 2025 to’o 2041.
Projetu ne’ebé aprezenta husi Ministru Transportes no Komunikasaun (MTK), Miguel Marques Gonçalves Manetelu.
“Desizaun ida-ne’e bazeia ba nesesidade atu asegura rezerva permanente ba kapasidade banda ‘internét’ no garante manutensaun kontínua no efisiente ba sistema kabu submarinu fibra ótika nian,” tenik iha nota ne’ebé Agência TATOLI asesu hosi media Gabinete Primeiru-Ministru.
Ligasaun submarina fibra ótika, ne’ebé liga Dili ba Darwin no Port Headland iha Austrália, hanesan infraestrutura krítika ida ba dezenvolvimentu teknolójiku no diversifikasaun ekonomia país nian.
Atu kompleksu tékniku estasaun aterrajen bele funsiona ho di’ak, presiza kontrata servisus espesializadus hodi asegura operasaun no manutensaun kontínua husi sistema ida-ne’e, nune’e bele kontribui ba asesu jeneralizadu no efisiente ba ‘internét’ iha territóriu nasionál tomak.
Notisia relevante:Empreza ASN finaliza ona instalasaun repetidór rua ba kabu submarinu
Jornalista: Hortencio Sanchez
Editór: Florencio Miranda Ximenes
