DILI, 27 agostu 2024 (TATOLI) – Reprezentante Espesiál Sekretáriu Jerál Organizasaun Nasaun Unida (ONU) nian mai Timor Leste, Sukehiro Hasegawa kontente no orgullu haree Timor-Leste nia dezenvolvimentu hahú mudansa husi lideransa Prezidente Repúblika José Ramos Horta ho Primeiru-Ministru Kay Rala Xanana Gusmão nian ho lideransa sira seluk.
“Ha’u kontente loos tanba Timor-Leste atu selebra tinan 25 konsulta populár 30 agostu. Depois konsulta populár iha 2002 ha’u mai Timor-Leste, momentu ne’ebá Timor-Leste sai membru ba nasaun unida. Hanesan imi hatene, iha tempu ne’eba ita ladun iha infraestrutura ne’ebé barak, no mós funsionamentu servisu nian. Agora ha’u haree katak Timor iha mudansa maka’as,” katak Reprezentante espesiál Sekretáriu Jerál ONU nian mai Timor-Leste ne’e ba jornalista sira iha Palásiu Prezidensiál Dili, tersa ne’e.
Tuir nia, Timor-Leste liuhusi nia lideransa sira habelar servisu maka’as iha área internasionál. Tanba Timor-Leste mós sai ona país ida ne’ebé iha liberdade no demokrásia.
“Ha’u hanoin ha’u mensióna ba Prezidente Repúblika katak agora Timor bele ona kontribui atu fó pas iha mundu. Timor- Leste solidu tebes ba país sira hanesan Indonézia, Xina, Japaun, Austrália no selu-seluk tan no mós solidu tebes ho país ASEAN sira hotu,” nia tenik.
Iha fatin hanesan, Prezidente Repúblika, José Ramos Horta, informa, enkontru ho Reprezentante Espesiál Sekretáriu Jerál ONU nian mai Timor-Leste, Sukehiro Hasegawa, la’o di’ak tebes.
“Governu Japaun mós apoia, akademiku sira nia apoia, ko’alia problema barak iha nasaun unida, konsellu seguransa laiha sentidu responsabilidade, membru permanente rasik mak halo funu, loloos sira mak prevene konflitu, rezolve konflitu, maibé sira mak halo fali,” katak Xefe Estadu.
PR Horta hatutan: ” Kreabilidade ONU ameasa maka’as, ema barak la fiar, entaun ha’u simu ona konvite atu ba Nova Iorke iha fulan-dezembru, ha’u sei ko’alia ho Sekretáriu Jerál atu halo konferensia bo’ot ida, ha’u sai hanesan Prezidente ba konferénsia ne’e, ko’alia kona-ba sistema mundiál, reforma ONU buat sira ne’e,” Horta hakotu.
Jornalista: Hortencio Sanchez
Editór: Florencio Miranda Ximenes
