PM Xanana agradese Japaun ne’ebé oferese ekipamentu pezadu ba Timor-Leste
DILI, 27 Agostu 2024 (TATOLI)- Primeiru-Ministru (PM), Kay Rala Xanana Gusmão agradese bá Governu no povu Japonés ne’ebé oferese ekipamentu pezadu sanulu (10), kompostu hosi mákina boot 6 no kiik 4 bá Governu Timor-Leste (TL) liu hosi Institutu Jestaun Ekipamentus no Apoiu Dezenvolvimentu Infraesturturas, Institutu Públiku (IGEADI, IP sígla portugés).
Sentidu agradesimentu ne’e Primeiru-Ministru hato’o iha serimónia entrega projetu melloria ekipamentu bá redusaun no rekuperasaun risku dezastre ne’ebé hala’o iha edifísiu IGEADI, I.P Colmera, tersa (27/08/2024).
“Agardese boot ba Governu no povu Japonés ne’ebé oferese ona ekipamentu pezadu sira ne’e, Agradese tanba povu Japonés oferese ho laran no la husu atu hetan buat ruma husi buat ne’ebé fó,” Xanana Gusmão agradese iha diskursu.
Iha fatin hanesan, Embaixadór Japaun iha Timor-Leste (TL), Tetsuya KIMURA rekoñese katak, kooperasaun entre TL ho Japaun iha istória neʼebé naruk, no tinan ida-ne’e signifikativu tebes liu-liu tanba marka aniversáriu bá dala-25 hosi Enkontru Parseiru Dezenvolvimentu dahuluk, ne’ebe hala’o iha Tokiu iha tinan 1999.
Kooperasaun iha seitör infraestrutura entre nasaun rua mós iha abut ne’ebé kle’an tanba Japaun koloka Peacekeeping Operations (PKO) ida bá Timor-Leste hosi fulan Marsu tinan 2002, hodi kontribui bá dezenvolvimentu nasaun ne’e nian.
Hafoin misaun ne’e remata, ekipamentu neʼebé uza durante tempu ne’ebå hela nafatin iha Timor-Leste no uza ona durante tinan 20-resin.
“Ha’u fiar katak prezensa duradiura ida-ne’e simboliza ligasaun metin entre Timor-Leste ho Japaun,” diplomata Japonés ne’e hateten.
Iha tinan hirak ikus ne’e, hosi tinan 2020 to’o 2023, Governu Japaun halo ona parseria ho JDRAC, ONG ida neʼebé harii hosi maioria Japoneza sira neʼebé partisipa iha misaun PKO, kona-bá projetu ida atu forma individu timoroan sira iha área manutensaun no operasaun mákina pezadu sira.
“Ha’u hetan oportunidade hodi observa treinamentu manutensaun no inspesaun iha Liquiça. Ha’u sei hanoin funsionáriu IGEADI nian kumprimenta-malu ho lia-fuan Goanzenni. Iha lian Japonés signifika hau dezezu seguransa ba ita-boot no sira involve ho sériu tebes iha formasaun. Ida-ne’e husik ha’u iha esperansa boot kona-ba futuru dezenvolvimentu infraestrutura Timor-Leste nian. Ha’u kontente atu fornese mákina pezadu foun sira-ne’e ba sira ne’ebé badinas hadi’a sira nia koñesimentu no abilidade,” nia hateten tán.
Projetu ne’e sei fornese mákina pezadu hamutuk 26 ho objetivu atu hasa’e nasaun nia preparasaun hasoru dezastre no kapasidade rekuperasaun.
Japaun iha komitmentu nafatin hodi apoia dezenvolvimentu Timor-Leste nian no povu Japonés kontinua prontu atu la’o hamutuk ho povu Timor-Leste.
Marka Prezensa iha serimónia ne’e Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, membru Governu sira, Deputadu balun, Prezidente Konsellu Administrasaun IGEADI, I.P, Ana Paula da Cruz no konvidadu sira.
Jornalista: Hortencio Sanchez
Editór: Florencio Miranda Ximenes
