DILI, 28 agostu 2024 (TATOLI) – Prezidente Autoridade Portuáriu Timor-Leste, Institutu Públiku (APORTIL,IP), José de Oliveira Leong, dehan APORTIL sei suspende provizóriu movimentu transporte marítima, hahú iha 8 to’o 11 setembru, iha ámbitu vizita Amu Papa.
“Hakarak informa ba públiku, Sarani Ataúro no Oe-Cusse katak hahú iha 8 to’o 11 setembru, APORTIL deside sei hapara atividade transporte marítima tanba relasiona ho atividade vizita Papa”, José de Oliveira hateten ba jornalista sira iha nia kna’ar Portu Dili, kuarta ne’e.
José informa, APORTIL simu ona lista peregrinadu sira husi Oe-Cusse ne’ebé atu tuir misa Santo Padre Francisco iha Tasi-Tolu.
“Lista peregrinadu sira husi Oe-Cusse, ami hetan ona, totál hamutuk 2.433. Enkuantu Ataúro nia mak ami sei halo hela koordenasaun ho Parokia Ataúro para sura fó lista mai. Ami iha ne’e, importante mak lista, para ita bele hatene ema na’in hira mak mai hodi ita bele rejista”, nia dehan.
Nia esplika, iha ámbitu vizita Papa, APORTIL sei hatún presu ba billete ró hanesan viajen husi Ataúro mai Dili ka Dili ba Ataúro, ne’e sei selu $5, enkuantu Dili ba Oe-Cuse mós $5.
“Ida-ne’e pedidu husi Prezidente RAEOA señor Rogeiro Lobato ne’ebé enkontru ho ami no ami kanaliza ida-ne’e ba ami-nia Ministru Transporte Komunikasaun no sua eselénsia Ministru Transporte Komunikasaun hasai ona despaisu katak kada sarani selu $5”, nia afirma.
Nia dehan, iha 2 setembru ró Berlin no Nakroman, hahú ba tula peregrinadu sira husi Ataúro no Oe-Cusse.
“Tanba haree ba peregrinadu sira husi Oe-Cusse mak barak, entaun ró Nakroman ne’e sei halo viajen dala lima no sei lori pasajeiru sira ho ema 450. Kapasidade ró mak nia labele lori ema barak no hanesan ha’u dehan, pasajeiru sira tenke to’o iha 8 setembru ho oras tuku lima loraik, tuku neen ita sei taka kuakler atividade ne’ebé halo iha Portu Dili depois, Amu Papa fila mak ita loke fali atividade iha Portu Dili“, nia informa.
Prezidente APORTIL ne’e hateten, peregrinadu sira husi Ataúro no Oe-Cusse, atu sae no tun, ekipa APORTIL hamutuk ho forsa tarrefa sei halo pasa revista.
“Ami sei bolu naran ba hirak ne’ebé naran la tama iha lista, ami sei la diskute tán tanba antes ne’e ami hateten ona ba komisaun sira ne’ebé trata ba asuntu ne’e. Ita laos atu deskonfia malu maibé Oe-Cuse ne’e fronteira ho kedan Indonézia inklui Ataúro mós besik rai kiik sira Indonézia nian, tanba ne’e ita presiza halo buat sira ne’e ho rigór tanba vizita ida-ne’e, laos vizita baibain”, nia haktuir.
Nia afirma, sé mak la tama iha lista, di’ak liu labele sae ró, tanba APORTIL no ekipa forsa tarrefa sei dada sai de’it.
“Tanba ne’e ha’u husu ba públiku, polísia no forsa mak sei halo vijilánsia no movimentu iha Portu Dili, husu imi labele hakfodak ba ida-ne’e”, nia konklui.
Jornalista: Natalino Costa
Editór : Zezito Silv
