Estudante universitáriu husu Estadu valoriza sidadaun nia moris
DILI, 29 agostu 2024 (TATOLI)–Estudante husi Universidade Oriental Timor-Lorosa’e (UNITAL), Ângelo Vieira da Costa Soares, husu Estadu atu valoriza sidadaun sira-nia moris, nune’e ema hotu bele sente ukun-an ne’ebé liuhusi prosesu naruk.
“Estadu ida-ne’e tenke valoriza sidadaun hotu nia moris atu labele husik ema balun iha kotuk. Tanba iha loron 30 agostu 1999 hanesan esperansa no loron istóriku ba timoroan, loron ne’ebé mak timoroan sira hamutuk hodi deside liuhusi votu, nune’e ohin loro-matan nakfera hodi lori hamanasa, lori kontente ho domin ba timoroan hotu,” Estudante universitáriu hateten iha UNITAL, Becora, kinta ne’e.
Nia husu atu ukun-na’in sira valoriza sidadaun sira-nia votu iha momentu istóriku tinan-25 liubá, iha loron 30 agostu 1999.
“Tanba realidadae ita haree sidadaun balun kontinua moris iha liña pobreza nia-laran,” nia akresenta.
Iha sorin seluk, Estudante Institutu Superiór Filozofia no Teolojia (ISFIT), Salomão Magno Amaral, hateten, Timor-Leste mai ho nia istória moruk iha tempu ne’ebá, tanba ne’e sidadaun hotu tenke valoriza no kontribui matenek nune’e bele lori dezenvolvimentu nasionál.
“Ha’u-nia esperansa hanesan joven mak iha dever, inteletuál, morál no responsabilidade hanesan líder sira dehan katak ami-nia responsabilidade mak atu liberta pátria, nune’e agora ba oin ha’u hanesan estudante iha dever, morál no inteletuál mak ha’u tenke estuda atu nune’e ha’u bele kontinua lori nasaun ida-ne’e ba oin,” nia tenik.
Notísia relevante : Dom Norberto: “Konsulta Populár hanesan kakuluk harii uma ida”
Hanesan joven no estudante, nia hakarak esforsu hodi lori nasaun ida-ne’e ba moris di’ak.
“Tanba nasaun ida-ne’e soberanu nune’e iha responsabilidade, tanba ne’e mak ha’u labele ejize demais Governu maibé ha’u tenke ezije ba ha’u-nia an saida mak ha’u atu fó ba nasaun,” Estudante universitáriu reforsa.
Nune’e mós, estudante ISFIT, Lucas dos Reis, dehan, nu’udár estudante tenke iha korrajen no sai kontinuadór ba istória independénsia ida-ne’e.
“Ha’u-nia esperansa mak ha’u nu’udár joven, primeiru ita tenke haree ba ita-nia pasadu tanba loron komemorasaun ne’e mós tanba iha akontesimentu iha pasadu ne’ebé fó hanoin ba ita atu komemora. Ita nu’udár joven ita kontinuadór, entaun ita haree ba ita-nia nasaun independénsia la’ós ita hetan gratuitamente ita hetan maibé ita liuhusi faze ida funu ema barak mak mate, ema barak mak sofre tanba ne’e ita atu komemora ne’e oinsá, ita komemora hodi fó valór ba sira-nia kontribuisaun ne’ebé mak sira luta iha pasadu ho ida agora ne’e,” nia tenik.
Estudante ne’e hatutan, nu’udar joven fó valoriza buat ne’ebé mak di’ak tanba uluk inan-aman vota ne’e ho hanoin di’ak, tanba ne’e ohin loron hetan ona buat di’ak mak oinsá komemora buat di’ak ne’e tenke fó valór di’ak.
“Ita-nia líder sira uluk iha unidade nasionál ida mak alkansa ita-nia nasaun ne’e hetan independénsia, entaun ita tenke luta ba ida-ne’e fali, ita nia unidade nasionál hapara violénsia liuhusi hapara problema sira, tanba as vezes ita tuda malu no problema sira ne’ebé mak ita hasoru ne’e hapara ho hanoin ida pozitivu atu ita tulun malu liuhusi buat di’ak ne’ebé mak kontribui ba nasaun, atu nune’e ita-nia nasaun ne’e sai joven no livre tanba objetivu husi sira-nia luta ne’e mak ita atu moris livre,” nia katak.
Estudante ISFIT, Antero Beresaka De Jesus Araújo, hateten, hanesan joven ida ba jerasaun foun presiza kontribui pás no estabilidade.
“Ha’u iha esperansa ida ho pesoalmente hanesan ha’u-nia rai no sidadaun timoroan, ho eperansa katak hanesan joven ida-ne’ebé di’ak ba rai doben Timor-Leste. Ho esperansa ida ne’ebé mak fó korrajen ba joven sira hotu iha loron 30 agostu iha momentu ne’ebá ita-nia aman-inan no família sira ne’ebé mak fó nia kontribuisaun liuhusi eleisaun ne’ebé mak liu ona iha altura ne’eba,” nia tenik.
Estudante ne’e konsidera, kondisaun ne’e fó esperansa katak ohin loron joven sira bele goza ukun rasik-an ida-ne’e liuhusi hetan edukasaun no fasilidade oin-oin.
“Nune’e esperansa ida ba futuru mak ne’e apreende no partisipa iha atividade sira ne’ebé mak fó benefísiu ba iha ita-nia futuru ho dignu no valór, ida-ne’e importante liu. Esperansa mantein nafatin prinsípiu no dignifika nafatin ita-nia kultura fiar no dignidade Timor nian,” nia salienta.
Jornalista : Osória Marques
Editora : Julia Chatarina
