Malázia hakarak apoia TL hodi dezenvolve setór ekonomia
DILI, 29 agostu 2024 (TATOLI) – Prezidente Repúblika, José Ramos Horta, kinta ne’e, hasoru malu ho Vise-Primeiru Ministru no Ministru Dezenvolvimentu Rurál no Rejionál Malázia nian, Dato’ Seri Ahmad Zahid Hamidi, hodi hato’o kompromisu apoia dezenvolvimentu ekonomia iha Timor-Leste.
“Ami ko’alia kona-ba área oioin ne’ebé iha interese mútua no kooperasaun, inklui parseria ekonómika no oportunidade komérsiu, haburas kolaborasaun edukasionál sira, no hasa’e kooperasaun iha setór sira hanesan infraestrutura, turizmu, no kapasitasaun,” tenik Xefe Estadu iha nota ne’ebé Agência TATOLI asesu husi media Palásiu Prezidensiál, ohin.
Xefe Estadu hatutan, sente onradu simu Vise-Primeiru-Ministru Hamidi ho nia delegasaun no vizita ida-ne’e marka etapa signifikativu ida iha relasaun entre Timor-Leste no Malázia.
Líder rua ne’e espresa sira nia kompromisu atu hametin relasaun bilaterál sira no esplora dalan foun sira ba kolaborasaun ne’ebé sei fó benefísiu ba povu hosi nasaun rua ne’e nian.
Vizita husi Vise-Primeiru-Ministru no Ministru Dezenvolvimentu Rurál no Rejionál Malázia nian mai Timor-Leste mós inklui partisipa iha eventu prinsipál oioin, hanesan sai sasin ba troka Memorandu Entendimentu entre instituisaun ensinu sira nasaun rua nian, ofisializa Meza Redonda.
Vizita ofisiál ida-ne’e subliña importánsia kresimentu Timor-Leste nian iha rejiaun no destaka esforsu nasaun nian atu hametin ninia relasaun diplomátika no ekonómika ho nasaun viziñu sira.
Ida-ne’e hatudu mos Malázia nia apoiu ne’ebé kontinua ba Timor-Leste nia aspirasaun atu sai membru kompletu ASEAN nian.
Vizita ne’e harii iha interkámbiu nivel aas resente entre nasaun rua ne’e no ho objetivu atu estabelese mekanizmu bilaterál ida hodi haree filafali no esplora área sira kooperasaun nian ne’ebé fó benefísiu ba malu, hodi aprofunda liután amizade no kolaborasaun ba tempu naruk entre Malázia no Timor-Leste.
Relasaun ne’e hametin liután ho vizita ofisiál husi Primeiru-Ministru iha tempu ne’ebá, Mahathir bin Mohamad, iha tinan 2003, ne’ebé sai nu’udar xefe governu dahuluk ne’ebé vizita Timor-Leste ne’ebé foin ukun-an.
Jornalista: Hortencio Sanchez
Editór: Florencio Miranda Ximenes
