PM Xanana: “povu mak eroi ba ukun rasik-aan”
DILI, 29 agostu 2024 (TATOLI) – Primeiru-Mimistru, Kay Rala Xanana Gusmão, konsidera povu mak eroi ba ukun rasik-aan, nune’e parabeniza povu Timor-Leste iha komemorasaun loron Konsulta Popular ne’ebé selebra ba tinan 25 30 Agostu 2024.
“Tinan 2024 sai núdar Tinan ida ne’ebé ita sei hala’o komemorasaun ba Tinan 25, bainhira Povu Timor tomak hamri’ik hodi hatudu ba mundu tomak katak rezistênsia ne’ebé naruk tebes ninia fim maka ne’e duni ukun rasik aan,” Mesajen PM Xanana liuhusi nota ne’ebé Agência TATOLI asesu husi media Gabinete Primeiru-Ministru, ohin.
Tuir PM Xanana, iha 30 Agostu 1999, povu ho ninia determinasaun no korajem tomak, ne’ebé hatudu ona iha tinan 24 nia laran, sai husi uma bá tú iha urnas, hodi duni militar okupante sira ho pregu.
Tanba ne’e, lider nasionál ne’e konsidera 30 agostu loron ba povu maubere nian.
Nune’e, nia husu ba jerasaun foun, atu ka’er metin istória no keta haluha prosesu sira ne’e hotu.
“Povu mak funu, povu mak terus, povu mak manán funu, povu mak eroi boot ba ukun rasik aan,” Xanana konsidera.
Xanana dehan tan, “iha tinan ida ne’e, 2024, tinan ida nebé ita selebra tinan 25 kona-ba Referendum, ita hotu sei buka hatene istória ne’ebé Katuas no Ferik sira sei konta mai ita hotu, hodi hametin memória Rezistênsia ida ne’ebé únika duni iha Mundu”.
Parabéns povu doben Timor-Leste, ho respeitu tomak ha’u haku’uak ba imi hotu Valentia, imi nia korajen ne’ebé laiha limitasaun.
Jornalista: Hortencio Sanchez
Editór: Florencio Miranda Ximenes
