Falur husu joven muda konsiénsia hodi dezenvolve
DILI, 30 agostu 2024 (TATOLI) – Xefe Estadu Maior Jenerál FALINTIL Forsa Defeza Timor-Leste (F-FDTL), Tenente Jenerál, Falur Rate Laek, husu ba joven sira atu muda karater no muda konsiénsia hodi kontinua dezenvolve Timor-Leste ba oin sai di’ak liu.
“Ha’u-nia apelu ba joven atu muda karater no muda iha konsiénsia hodi halo di’ak ba nia-rain atu ita bele atrai ba investór sira bele mai investe iha ne’e hodi loke kampu traballu ba ita hotu hodi dezenvolve di’ak liután bai ta-nia rain no ita bele halo servisu ho di’ak”, Farul Rate Laek, informa ba jornalista sira bainhira partisipa iha serimónia Konsulta Popular 30 Agostu ba dala 25 iha Estádiu Munisipál Dili, ohin.
Nia dehan, komemorasaun 30 agostu ida-ne’e Timor-leste iha mudansa barak hanesan infraesturura bázika sira hanesan, estrada, bee moos, liña eletrisidade no seluk tan.
”Husi komemorasaun loron konsulta popular ba dala 25, ita iha mudansa ba dezenvolvimentu ne’ebé mak di’ak ba ita-nia nasaun”, nia esplika.
Jornalista : Felicidade Ximenes
Editór : Zezito Silva
