Austrália iha kompromisu kontinua simu traballadór Timoroan
DILI, 30 agostu 2024 (TATOLI) – Vise Primeiru-Ministru Austrália, Hon Richard Marles, sesta ne’e, hasoru malu ho Primeiru-Ministru, Kay Rala Xanana Gusmão, hodi ko’alia kona-ba hametin kooperasaun bilaterál entre nasaun rua.
Durante enkontru ezekutivu na’in-rua ne’e ko’alia kona-bá kooperasaun entre Austrália ho Timor-Leste liu-liu ba futuru atu simu joven timoroan sira bá servisu iha Austrália.
“Ami ko’alia oitoan kona-ba adezaun Timor-Leste nian bá ASEAN, kona-ba saida maka Austrália bele ajuda hodi dezenvolve Timor-Leste no Australia kontinua simu joven sira ba servisu,” Xanana Gusmão hateten ba jornalista sira iha Palásiu Governu, sesta ne’e.
Vise-Primeiru Ministru ne’e, reprezenta Governu Austrália hodi partisipa iha serimónia komemorasaun loron konsulta populár ba dala-25 (30 Agostu 1999-30 Agostu 2024).
Nune’e mós Vise Primeiru-Ministu Austrália sente ondradu bo’ot tebes tanba reprezenta duni povu Austrália bele mai selebra hamutuk loron referendu Timor-Leste nian.
Nia sente hakfodak tebes tanba haree dezenvolvimentu Timor-Leste nian no rekoñese katak, fizikamente dezenvolvimentu iha duni tanba mai hosi planu Kay Rala Xanana Gusmão.
Jornalista: Hortencio Sanchez
Editór: Florencio Miranda Ximenes
