DILI, 02 setembru 2024 (TATOLI)–Igreja Katólika Timor-Leste hahú fahe ona kamiza ho dezeñu Papa francisco, ba sarani sira ne’ebé rejistadu sei partisipa misa iha Tasi-tolu iha loron 10 setembru.
“Ami la fó padraun ba ema na’in hira mak tenke rejistu, maibé komisaun husu atu loke fali to’o loron 05 setembru tanba tuir loloos sei taka iha fulan-agostu ne’e. Ita mós fahe gratuita kamiza ne’ebé komisaun organizadora prepapara hahú distribui ba sarani sira-ne’ebé hetan ona rejistu hodi uza partisipa misa iha Tasi-tolu,” Administradór Parókia São José Aimutin, Padre Hélio Castro Alves, informa ba Agência Tatoli iha Parókia São José, Ai-mutin, segunda ne’e.
Tuir dadus husi Arkidioseze Dili, rejista ona sarani hamutuk 66.442 husi Parókia 10 iha kapitál Dili, ne’ebé espesífiku husi Parókia São José Ai-mutin, rejista sarani hamutuk 10.071.
Notísia relevante : Papa Francisco viajen daudaun mai Indonézia
Kamiza ne’ebé komisaun prepara hahú husi 02 setembru, kada Parókia iha munisípiu hotu sei hahú fahe kamiza ba misa ne’ebé prezide husi Papa Francisco ba kada kongregasaun ne’ebé rejistu ona.
“Distribuisaun hahú ohin ba misa iha Tasi-Tolu no ami simu ona kamiza 11.000-resin husi komisaun. Sé de’it mak foti kamiza sira ne’e tenke lori kartaun rejistu no depois sei fó sinál ba sira atu nune’e ita hatene katak povu foti ona sira-nia kamiza sira. Ida-ne’e sei fó ba sira hotu ne’ebé rejistu ona, tanba rejistrasaun kontinua nafatin to’o kinta oin mai. Ita hein katak ema barak liután sei marka prezensa,” nia tenik.
Iha sorin seluk, Ekipa Sesaun Litúrjika, Eligio José Marçal, hateten, iha Parókia Maria Auxiladora do Carmo, Comoro, rejista ona sarani 11.900-resin.
“Tuir loloos taka iha loron 13 agostu, maibé Dioseze husu atu loke fali to’o loron 29 agostu no tanba barak mak seidauk rejistu, ami loke fali to’o loron 05 setembru. Loos duni, ami to’o ona 11.000-resin no karik kamiza la to’o ami sei koordena ho ekipa komisaun nian,” nia katak.
Antes ne’e, Sekretariadu Komisaun Institusionál Altu Nível ba Vizita Papa Francisco nian rasik prepara kamizola 700.000.
Jornalista : Arminda Fonseca
Editora : Julia Chatarina
