Empreza CHLN finaliza ona konstrusaun kampu futeból multifunsaun iha Becora
DILI, 03 setembru 2024 (TATOLI)– Diretóra Nasionál Patrimóniu Lojístika no Infraestrutura Ministériu Juventude Desportu Arte no Kultura (MJDAK),Maria Luisa Monteiro, hateten, konstrusaun ba kampu futeból Becora ne’ebé apoia husi KOICA, nune’e empreza CHLN Timor Unipesoal Lda finaliza ona konstruisaun no hein entrega ba Governu.
“Konstrusaun ba kampu futeból Becora empreza finaliza 100% ona, entaun kona-ba fasilidade sira Governu mak sei kompleta, bainhira KOICA ho empreza entrega mai Governu iha Janeiru 2025,” Diretora ne’e hateten ba Agência TATOLI iha Comoro Dili, tersa ne’e.
Diretora ne’e dehan, foin lalais ne’e Ministru Juventude, Nelyo Isaac Sarmento, akompaña halo ona inspesaun ikus hodi haree progresu kampu ne’e.
Durante observa, parte Governu nota katak kampu Becora konkluidu ona, hanesan instalsaun ahi, bee funsiona bele utiliza.
“Kampu ne’e kompleta ho dormitóriu, bele akomula ona ita nia atleta selesaun sira, fasilidade ne’ebé Governu sei kompleta mak mareriál ba GYM, armariu iha dormitóriu laran no kama ba jogadór sira atu deskansa,” Diretora ne’e tenik.
Konstrusaun ba kampo Becora pakote ho kampu tolu seluk hanesan, Bintang Bidau, Kampung Alor no Comoro ho orsamentu hamutuk millaun $2.4. Iha ne’ebé konstroi hosi empreza CHLN Timor Unipesoal Lda.
Progresu kampo tolu seluk
Diretora ne’e dehan tan, kona-ba kampo tolu seluk hanesan Bintang Bidau, Kampung Alor no Comoro empreza konklui ona to’o 95%.
“Ita mós halo ona observasaun jerál ba kampu ki’ik tolu, Bintang, Kampung Alor no Comoro, ita haree rasik obra sira ne’e atinje ona 95%,” nia dehan.
Tuir planu ne’ebé iha kampo kiik tolu ne’e empreza sei entrega ba KOICA iha fulan-outubru mai ne’e hodi entrega fali ba Governu.
“Projetu haat ne’e sei entrega totalmente iha fulan janeiru, iha kampo ki’ik tolu ne’e kompaiña sira halo hanesan dormitoriu kiik ba jogadór sira hodi troka, no atiru kampo halo hanesam no sintetu iha kampo laran sei responsabiliza hosi Governu,” Maria tenik.
Konstrusaun ba morru protesaun kampu Becora
“Kona-ba moru proresaun ba kampo Becora nian agora dadaun ita loke hela tenderizaun iha tempu besik ita konklui atu nune’e empreza bele kontinua servisu,” tenik.
Nia hatutan, konkursu ne’ebé MJDAK loke prioridade ba empreza lokál ho nia orsamentu hamutuk rihun $800-resin no orsamentu ne’e la’os de’it ba moru protesaun maibé sei halo mós dranajen no filtrajen ba bee iha kampo ninin.
Jornalista: Hortencio Sanchez
Editór : Florencio Miranda Ximenes
