Diresaun Veterinária rejista asu 41 mak infetadu ho raiva
DILI, 04 Setembru 2024 (TATOLI) – Diresaun Veterinária, Ministériu Agrikultura, Pekuária, Peska no Floresta (MAPPF) rejista asu pozitivu ho moras raiva hamutuk 41.
Diretora Veterinária, Joanita Jong, informa katak depoizde halo vasinasaun ba asu sira iha munisípiu lima hanesan Rejiaun Administrativa Espesiál Oé-Cusse Ambeno (RAEOA) Bobonaro, Covalima, Dili no Ataúro, husi Janeiru to’o Agostu, rejista ona asu pozitivu ho raiva.
“Iha ita-nia programa vasinasaun ba asu, busa, lekirauk iha munisípiu risku sira ne’e, ita konsege identifika asu hamutuk 41 mak afeta ho moras raiva. Iha Rejiaun Administrativa Espesiál Oé-Cusse iha asu 29, Bobonaro sia no iha Covalima tolu mak afeta moras raiva”, Joanita Jong adianta ba Tatoli, iha Timor Plaza, ohin.
Asu sira ne’ebé rejista iha munisípiu tolu ne’ebé afeta ba moras raiva ne’e mai husi Indonézia no tama liuhusi fronteira, tanba kobertura vasinasaun iha Indonézia ne’e ninia volume sei ki’ik tebes.
Joanita Jong salienta katak asu 41 ne’ebé diresaun identifika afeta ba moras raiva ne’e depois sira mate ona maka foin hatene katak pozitivu ba moras ne’e.
“Ita foti sample husi asu sira ne’e depois lori bá halo teste iha laboratóriu, maibé asu sira ne’e mate ona. Kuandu sira sei moris, ita sei labele foti sample”, dehan.
Tuir dadus, asu sira ne’ebé hetan ona vasinasaun iha munisípiu lima ne’e ho totál 43.830.
Notísia relevante: Servisu veterináriu MAPPF halo intervensaun lalais ba moras raiva
Jornalista: Tomé Amado
Editora: Maria Auxiliadora
