PR Horta parabeniza povu Malázia ne’ebé selebra aniversáriu ukun rasik-aan ba dala-67
DILI, 04 setembru 2024 (TATOLI) – Prezidente Repúblika, José Ramos Horta, parabeniza povu Malázia ne’ebé komemora aniversáriu ukun rasik aan ba dala 67.
Xefe Estadu hato’o nia deklarasaun bainhira partisipa iha aniversáriu Malázia nian ne’ebé realiza, tersa kalan, iha Otel Timor Lodge Comoro Dili.
“Ha’u sente ksolok tebes atu hamutuk ho ita-boot sira iha kalan ne’e bainhira ita selebra aniversáriu ba dala 67 ba nia loron independensia Malázia nian,” Xefe Estadu relata iha diskursu.
Xefe Estadu dehan, loron ida-ne’e komemora momentu importante ida iha istória Malázia nian, hodi simboliza triunfu husi determinasaun povu ida nian atu hetan liberdade, soberania, no dezenvolvimentu.
“Enkuantu ita selebra independénsia Malázia nian, ita mós fó omenajen ba reziliénsia no rezolusaun husi povu Malázia nian no fó onra ba realizasaun istóriku sira husi líder fundadór sira nasaun nian, Tunku Abdul Rahman, Tun Tan Cheng Lock, Tun V. T. Sambanthan, Dato’ Onn Jaafar, no Tun Abdul Razak Hussein. Sira nia vizaun no sakrifísiu sira kontinua inspira jerasaun sira, hodi enkarna espíritu unidade no progresu nian ne’ebé define Malázia ohin loron,” Xefe Estadu ho omajen.
Nia dehan tan, “Ami goza amizade ne’ebé metin no dura ho Malázia parseria ida ne’ebé sai kle’an liután dezde ami nia independénsia rasik iha 2002”.
Malázia hanesan mós nasaun dalauluk ne’ebé hamri’ik iha Timor-Leste nia sorin iha momentu sira ne’ebé dezafiante liu, inklui nia partisipasaun iha misaun manutensaun pás nian no apoia kontínu ba Timor-Leste nia dezenvolvimentu sosiu ekonómiku.
“Enkuantu ita komemora aniversáriu ba dala 25 Konsulta Populár 1999 no Misaun INTERFET iha 2024, eventu markante sira ne’ebé subliña ita-nia kompromisu ba dame no rekonsiliasaun, ha’u hato’o ha’u nia agradesimentu ba Honorável Vise-Primeiru-Ministru no Ministru Dezenvolvimentu Rejionál no Rurál Malázia nian, Dato’ Seri Ahmad Zahid Hamidi, tanba hala’o ninia vizita ofisiál dahuluk mai Timor-Leste durante selebrasaun hirak ne’e,” nia tenik.
Timor-Leste haksolok atu aloka ona rai ba konstrusaun Embaixada Malázia nian iha Timor-Leste, hodi marka kapítulu foun ida iha Timor-Leste nia relasaun bilaterál sira tanba kontinua kolabora iha área importante sira hanesan edukasaun, saúde, infraestrutura, diversifikasaun ekonómika, no komérsiu.
Timor-Leste valoriza tebes Programa Kooperasaun Téknika Malázia nian (MTCP), ne’ebé fornese ona formasaun esensiál ba funsionáriu públiku na’in 784, no hein atu habelar oportunidade formasaun akadémika.
“Ami mós apresia oferta foin lalais ne’e ba bolsa estudu 50 hosi Universidade Kuala Lumpur ba programa Mestradu no Doutoramentu,” tenik.
Timor-Leste no Malázia serbisu hamutuk iha fórum sira hanesan Asosiasaun Nasaun Sudeste Aziátiku (ASEAN) no Organizasaun Mundiál Komérsiu (OMK), hodi promove arkitetura rejionál ida ne’ebé inkluzivu no rezolve dezafiu globál sira hanesan mudansa klimátika no dezenvolvimentu sustentável.
Integrasaun tomak Timor-Leste nian iha ASEAN, ne’ebé hein atu akontese iha 2025 ho prezidénsia Malázia nian, sei hametin kooperasaun rejionál. Timor-Leste agradese ba Malázia nia apoiu metin iha prosesu ida-ne’e.
“Ha’u aproveita oportunidade ida-ne’e atu rekoñese lideransa vizionáriu hosi Primeiru-Ministru Anwar bin Ibrahim, ne’ebé nia kompromisu ba progresu kontinua atu hasa’e Malázia nu’udar nasaun ida ne’ebé modernu, avansadu iha teknolojia no ekonomikamente forte,” Antigu Ministru Negósiu Estranjeiru no Kooperasaun ne’e hateten.
Iha okaziaun ne’e, Horta hato’o agradesimentu ba Embaixadór Amarjit Singh Sarjit Singh ba nia dedikasaun ne’ebé la kole hodi haburas relasaun entre Timor-Leste no Malázia.
“Ha’u kongratula Ita-boot nia Exelénsia no funsionáriu sira Embaixada nian ba realizasaun sira iha área oioin kooperasaun nian, ne’ebé sai hanesan testamentu ida ba kompromisu Malázia nian hodi hametin lasu bilaterál sira,” dehan.
Jornalista: Hortencio Sanchez
Editór: Florencio Miranda Ximenes
