Xanana ho Kristy Gusmão lansa livru “Ili Matar” kona-ba biografia Nino Konis Santana
DILI, 04 setembru 2024 – Líder nasionál nu’udar mós Primeiru-Ministru (PM), Kay Rala Xanana Gusmão lansa livru ho naran “Ili Matar” ne’ebé hakerek husi Kay Rala Xanana Gusmão ho Kirsty Sword Gusmão, kona-bá istória biográfiku Nino Konis Santana.
Livru ne’e lansa iha Sala Leitura Xanana Gusmão, Lesidere, marka prezensa husi Ministra Edukasaun, Dulce de Jesus Soares no Gil da Costa, iha kuarta ne’e.
Iha diskursu, Primeiru-Ministru husu bá estudante sira atu hatoman a’an lee barak tanba bele aumenta matenek no koñesimentu.
“Ha’u husu ba labarik sira, buka hatene istória Timor nian, nune’e ema husi rai liur husu karik bele konta netik, atu hatene istória tenke lee barak,,” Xanana hateten liuhosi nota ne’ebé Agência TATOLI asesu hosi media Gabinete PM, ohin.
Xefe Governu agradese ba Kirsty Sword tanba bele hakerek livru ida kona-bá istória Nino Konis Santana ne’ebé ninia orijen husi munisípiu Lautém.
“Livru ne’e fiksaun uitoan hodi motiva labarik sira atu lee, se la’e ita hein de’it husi rai liur mak mai, rona buat uitoan, hakerek mais la’ós saida mak mosu iha ita nia rai no ita nia avo sira hetan iha tempu ne’ebá,” Xanana subliña.
Biban hanesan, Hakerek na’in, Kirsty Sword Gusmão afirma, livru ida ne’e inisiativa ida husi Ministériu Edukasaun, liu-liu Ministra Edukasaun Dulce de Jesus Soares, atu hatutan istória husi tempu rezisténsia ba jovén sira. Ne’ebé livru ida-ne’e sei fahe ba eskola Ensinu Báziku hotu.
Rezumu husi istória biográfika Nino Konis Santana nian maibé ho forma fiksaun istóriku katak iha faktu sira maibé iha buat balun ne’ebé inventa hodi halo istória ida ne’e sai atraitivu liután ba joven sira.
Nia iha esperansa katak, liuhusi livru istória ne’ebé ministériu edukasaun publika no sei ba fahe ba eskola hothotu, hodi joven sira bele hatene di’ak liután kona-bá istória rezisténsia liu-liu kona-bá istória moris Komandante Nino Konis Santana.
Livru ne’e hakerek iha tinan-haat liubá, momentu ne’ebá Kirsty Sword servisu iha ministériu edukasaun nu’udar konsultór foka ba dezenvolve materiál didátiku, inklui livru ba ensinu báziku I síklu no II síklu.
Partisipa iha seremónia lansamentu ne’e mai mós husi Reitór Universidade Nasionál Timor Loro-sa’e (UNTL), João Soares Martins, estudante husi Dili Institute of Technology (DIT), no estudante sira.
Jornalista: Hortencio Sanchez
Editór: Florencio Miranda Ximenes
