DILI, 05 setembru 2024 (TATOLI)–Prezidente Repúblika (PR), José Ramos Horta akompaña no lamenta ho atuasaun husi ekipa konjunta ne’ebé lidera husi Sekretaria Estadu Asuntu Toponímia no Organizasaun Urbana (SEATOU) ba vendedór ambulante sira iha área Kampung-baru iha semana ne’e nia laran.
“Ha’u mós ohin foti problema SEATOU ne’ebé baku ema kiak, ha’u hatudu vídeo ba Señor Xanana, nia la haree, nia husu akotense horibainhira, ha’u dehan loron rua-tolu liubá. Nusa mak labá ko’alia didi’ak ema muda lae, tenke fó kompensaun. Ha’u husu Maun Xanana ba ema sira-ne’e no oferese kompensasaun ba sira, ida-ne’e ha’u konkorda no ha’u rasik hanesan Prezidente desizaun mak ne’e, Governu la halo buat ruma, ein termu husu deskulpa no kompensasaun, pronto ha’u ho ha’u-nia osan rasik atu fó kompensasaun ba ema sira-ne’ebé nia sasán lakon no estraga,” Horta hateten hafoin halo enkontru semanál ho Primeiru-Ministru, Kay Rala Xanana Gusmão, iha resintu Palásiu Prezidensiál, Bairru-Pité, kinta ne’e.
Notísia relevante : PR Horta kondena maka’as SEATOU halo atuasaun agresivu hasoru negosiánte ambulante
Biban ne’e, PR husu parte hotu nia kolaborasaun hodi buat hotu bele la’o ho di’ak.
“Laiha insidente akontese, povu, joven hamutuk, labele ba estraga no sobu, baku rahun ema nia sasán,” nia akresenta.
Hatán ba preokupasaun no lamentasaun Xefe Estadu, PM Xanana dehan, presiza esklarese didi’ak ba populasaun ne’ebé fa’an no labele hatudu bandalizmu.
“Baku karik, ne’e labele, tenke bolu atensaun, ko’alia fó esklarese, ida-ne’e mak loloos komportamentu di’ak,” nia tenik.
Jornalista : Osória Marques
Editora : Julia Chatarina
