DILI, 09 setembru 2024 (TATOLI)– Sarani iha arredór Faról no fatin balun iha Dili laran hahú hakbesik aan ona ba estrada ibun parte Faról ho kontente hodi hein Sua Santidade Papa Francisco ne’ebé sei to’o Timor-Leste iha tuku 14:10.
“Ami sente kontente, maske loron manas, mais ami la preokupa importante mak tenke haree Amu Papa no simu bensaun,” Sarani Maria Monteiro ne’ebé hamriik iha Estrada Faról hateten ba Agência TATOLI, segunda ne’e.
Nia dehan, prezensa Papa iha Timor-Leste hanesan lori grasa no bensaun mai povu Timor-Leste.
“Ida ne’e hanesan grasa ida mai ita, nu’udar fiar nain la sente loron nia manas, la sente kole, importante hetan bensaun,” Maria dehan.
Iha sorin seluk, sarani husi Balide ne’ebé mai hamrik hotu iha estrada Faról Elizeu José Dias do Rego hateten, sente kontente no konsidera vizita Papa mai Timor-Leste hanesan milagre.
Duadaun ne’e Papa Francisco viajen hela hosi Papua Nova Guiné mai Timor-Leste ho aviaun RNIUGINI ho nia BOEING 737.
“Ida ne’e hanesan milagre ida ba ita timoroan, tanba vizita Papa iha ita nia nasaun hamutuk dalarua ona iha 1989 no agora tan. Ami kontente tebes, ne’e mak husi Balide mai to’o iha ne’e hakarak haree Amu Papa,” Elizeu hateten.
Rekorda fali iha loron 05 fulan-jullu tinan 2024, Vatikanu anunsia ofisialmente, programa Vizita Papa Francisco nian mai Timor-Leste, ne’ebé halo parte husi ninia Viajen Apostólika ba Ázia, ne’ebé marka ona ba períodu husi loron 2 to’o loron 13 fulan-setembru tinan 2024. Aleinde Timor-Leste, viajen ida-ne’e mós inklui etapas iha Indonézia, Papua-Nova Giné no Singapura.
Santu Padre sei to’o iha Timor-Leste iha segunda-feira, loron 9 fulan-setembru tinan 2024, sei hela iha Timor to’o kuarta-feira, loron 11 fulan-setembru tinan 2024.
Programa detalladu ba vizita Papa Francisco mai Timor-Leste hahú ho resesaun ofisiál uainhira Papa to’o iha Aeroporto Internacional Presidente Nicolau Lobato iha tuku 14:10.
Iha tuku 18:00, sei hala’o serimónia boavinda iha área esteriór Palásiu Prezidensiál, tuir kedas ho vizita kortezia ba Prezidente Repúblika iha tuku 18:30. Santu Padre sei hala’o sorumutu ida ho autoridade lokál, sosiedade sivíl no korpu diplomátiku iha sala Palásiu Prezidensiál iha tuku 19:00, iha ne’ebé sei halo diskursu ida.
Iha tersa-feira, loron 10 fulan-setembru, tuku 08:45, Papa sei vizita labarik sira ho defisiénsia husi Eskola “Irmãs Alma”. Tuku 09:30, sei hala’o sorumutu ho bispu no membru sira seluk igreja katólika nasionál nian iha Katedrál Imaculada Conceição. Tuku 10:45, Papa sei hala’o sorumutu ho membrus Kompañia de Jesus iha Nunsiatura Apostólika.
Pontu aas husi vizita ne’e maka iha loron 10 fulan-setembru mós, selebrasaun Santa Misa iha resintu Tasi Tolu, ne’ebé sei hahú iha tuku 16:30 no iha tempu ne’e Papa Francisco sei halo omilia.
Iha kuarta-feira, loron 11 fulan-setembru, Papa Francisco sei hasoru joven sira iha Sentru Konvensoins Dili, iha tuku 09:30, iha ne’ebé sei halo diskursu ida. Iha tuku 10:45, sei hala’o serimónia despedida iha Aeroporto Internacional Presidente Nicolau Lobato, tuir mai Papa sei arranka ba Singapura iha tuku 11:15.
Etapa seluk husi Viajen Apostólika ba Ázia inklui Indonézia, iha ne’ebé Papa Francisco sei to’o iha Jakarta iha loron 3 fulan-setembru no sei fila iha loron 6 fulan-setembru tinan 2024.
Tuir mai, Santu Padre sei ba Port Moresby, Papua-Nova Giné, iha loron 6 fulan-setembru no sei to’o mai Timor-Leste iha loron 9 fulan-setembru tinan 2024. Ikusliu, hafoin vizita mai Timor-Leste, Papa Francisco sei ba Singapura iha loron 11 fulan-setembru no sei fila ba Roma iha loron 13 fulan-setembru tinan 2024.
Hafoin anúnsiu ofisiál vizita papál, Reprezentante Governu, Vise-Koordenadór-Jerál Altu Nivel Institusionál ba vizita papál no Koordenadór-Jerál ein ezersísiu, Ministru Tomás do Rosário Cabral, afirma katak “ho esperansa no entuziazmu boot ita hein Papa Francisco nia xegada” no fiar “katak Vizita Apostólika ida-ne’e sei sai momentu bénsaun no renovasaun espirituál ida ba timoroan sira hotu, hodi inspira ita ida-idak atu kontinua harii sosiedade ida bazeia ba valór pás, solidariedade no fraternidade”.
Jornalista: Hortencio Sanchez
Editór: Florencio Miranda Ximenes
