DILI, 10 setembru 2024 (TATOLI) – “Ha’u mai la’ós tanba sándalu, maibé tanba povu”, mak hanesan liafuan murak no domin ne’ebé hato’o husi Sua Santidade Papa Francisco, hafoin prezide Misa Solene ne’ebe partisipa sarani $1.700-resin, iha Tasi-Tolu-Dili.
“Ha’u hanoin barak kona-ba saida maka di’ak liu iha Timor, ai-sándalu, ai-teka, la’e, ida-ne’e la’ós di’ak liu. Di’ak liu maka nia ema sira,” dehan Amu Papa bainhira ramata misa iha Tasi-Tolu-Dili.
Papa Francisco dehan tan, “ha’u labele haluha sidade ne’ebá iha estrada ninin, ho labarik sira, sidade ne’e iha labarik hira! Buat di’ak liu ne’ebé sidade ida-ne’e iha maka labarik sira nia hamnasa.”
Nia hatutan, Timor-Leste sidade ida ne’ebé hanorin nia oan sira atu hamnasa maka sidade ida ho futuru.
“Maibé kuidadu, tanba sira hatete mai ha’u katak lafaek sira mai iha tasi-ibun balun. Lafaek sira ne’ebé mai nani no iha mordida maka’as liu duké saida maka ita ka’er. Atensaun… atensaun ba lafaek sira ne’ebé hakarak muda ita-boot nia kultura, ita-boot nia istória. No keta hakbesik ba lafaek sira-ne’e tanba sira tata, no sira tata barak”.nia tenik.
Alende ne’e, Santu Padre ne’e mós dezeja dame ba timoroan hotu hodi iha oan ne’ebé barak ba futuru.
“Ha’u dezeja dame ba ita-boot sira. Ha’u dezeja atu ita-boot sira kontinua iha oan barak, katak sidade ida-ne’e nia hamnasa kontinua sai labarik sira nia kontente,” dezeja Amu Papa.
“Tau matan ba imi nia oan sira, maibé tau matan mós ba imi nia ferik-katuas sira, ne’ebé sai hanesan memória ba rai ida ne’e”.
Sua Santidade Papa Francisco hatutan: “Obrigado, obrigado barak ba ita-boot nia karidade. Hodi imi nia fiar. La’o ba oin ho esperansa. No agora ita atu husu ba Na’i atu haraik bensaun ba ita hotu. No depois ita sei hananu knananuk ida ba Virjen Maria,” nia hakotu.
Jornalista: Hortencio Sanchez
Editór: Florencio Miranda Ximenes
