TL derrota ho Mongolia iha jogu daruak kualifikasaun tasa Ázia 2027
DILI, 10 setembru 2024 (TATOLI) – Ekipa selesaun nasionál Timor-Leste seniór ne’ebé ho naran istimadu Lafaek obrigadu tenke derrota 0-2 iha segundu jogu kualifikassun tasa Ázia 2027 kontra Mongolia, maibé Timor-Leste kontinua haka’at ba oin tanba agregat (4-3).
Jogu ba ekipa rua hala’o tersa loraik ne’e, iha Estádiu Ulaanbataar Mongolia. Bainhira jogu la’e ekipa rua hatudu jogu ne’ebé brillante maibé Mongolia halo presaun ne’ebé maka’as.
Maibé Timor-Leste la nonok de’it, koko halo dezmantela iha liña oin maibé armada Mongolia halo atake ne’ebé lais liu, nune’e iha minutu 8 jogadór Mongolia Daginaa konsege fura ona rede Timor-Leste nian hodi lori rezultadu ba 1-0.
Ho golu ne’e halo Timor-Leste tenke servisu maka’as liutan atu rekupera golu ne’e maibé, avansadu Timor-Leste falla iha ezekusaun ikus la prodús golu.
Mongolia tenta halo atake maka’as mai liña Timor-Leste, maibé defeza Timor-Leste tenta salva ho atake ne’ebé adekuadu no guarda rede Timor-Leste mós iha kapasidade di’ak hodi salva sutu barak ne’ebé avansadu Mongolia halo.
Nune’e, jogu la’o to’o minutu primeira parte termina vitória provizóriu hela ba Mongolia lidera 1-0, maibé agregat (4-2) no Timor-Leste mak sei lidera hela.
Dolar ba segunda parte ekipa Timor-Leste kontinua halao atake ne’ebé maka’as maibé laiha oportunidade, nune’e to’o minutu ’54 jogadór Amaraa hetan oportunidade osan mean termina golu ikus muda rezultadu ba 2-0.
Golu ne’e fó ona presaun ba Timor-Leste tanba hela de’it golu ida atu muda agregat ba empata tanba agregat hatudu ona ba (4-3).
Mongolia esforsu liutan atu muda agregat ba (4-4) bainhira iha prodús tan golu ida ba Timor-Leste, maibé esforsu hotu Mongolia halo sai sorte aat ba sira tanba to’o jogu termina Timor-Leste halo defensivu ne’ebé maka’as no la fó fatin ba Mongolia atu lansa tan golu.
Nune’e rezultadu jogu mantein ho 2-0 to’o jogu minutu 90 termina vitoria nafatin hela ba Timor-Leste hodi haka’at ba jogu seluk tuir mai iha faze tasa Ázia nian.
Maske Mongolia manán 2-0, maibé iha jogu primeiru ne’ebé Timor-Leste ho Mongolia hala’o iha Bali Indonézia semana kotuk Timor-Leste manán ho eskore 4-1, nune’e hatur agregat ba 4-3.
Ho nune’e Timor-Leste sei prepara aan maka’as ba jogu ronde dala-tolu nian iha tasa Ázia 2027 nian.
Jornalista: Hortencio Sanchez
Editór :Florencio Miranda Ximenes
