Hakarak hetan bensaun, sarani barak halai tuir karreta ne’ebé tula Amu Papa Francisco
DILI, 11 setembru 2024 (TATOLI) – Sarani atus ba atus hamri’ik iha estrada ibun hodi hein bensaun ikus husi Sua Santidade Papa Francisco antes husik Timor-Leste, sarani sira halai tuur no hakilar tuir Amu-Papa nia kareta tama to’o aeroportu Prezidente Nicolao Lobato.
“Adeus Amu-Papa, la’o ho Maromak,” Srani sira hakilar bainhira halai tuir Papa nia kareta hosi rotunda tama to’o aeroportu maske seguransa sira impede.
Srani sira barak hamrik nonok iha fatin halo orasaun no balu nahe sira nia tais iha dalan klaran nune’e Amu-Papa nia kareta bele sama.
Tuir observasaun TATOLI nian iha aeroportu Srani barak tabele iha rede aeroportu nian hodi haree Papa sae aviaun no hein to’o aviaun semo.
Alende ne’e, srani balu hamrik iha foho leten Rai-Kotu nian hodi hateke tun ba aeroportu laran hakarak haree de’it aviaun ne’ebé Amu-Papa atu sa’e.
Tuir orariu tuku 12:15 Amu-Papa sei semo ho aviaun Aero Dili kontinua nia viajen ba Sungapura hafoin liu ba Vatikanu.
Ohin mak loron ikus ne’ebé Papa Francisco vizita Timor-Leste no Papa vizita Timor-Leste durante loron tolu hahú 09-11 setembru.
Jornalista: Hortencio Sanchez
Editor: Florencio Miranda Ximenes
