DILI, 11 setembru 2024 (TATOLI)—Reprezentante Joven husi Relijiaun Musulmanu, Ilham Salmin Bin Mahfud dehan ba Santo Padre, Papa Francisco iha ninia testemuña deklara sente moris iha toleransia nia laran iha Timor-Leste.
Dader ne’e Papa Francisco halao ona enkontru hamutuk ho joven 3.000 iha Sentru Konvensaun Dili (CCD) hodi rona mós testemuña husi joven nain ha’at inklui Reprezentante Joven husi Relijiaun Musulmanu, Ilham Salmin Bin Mahfud.
“Santo Padre iha Timor-Leste, ami sente duni moris iha toleransia relijiozu nia laran, maioria timor-oan sira kompriende oinsa atu hamutuk maske ho relijiaun la hanesan,” Ilham Salim deklara iha nia testemuña iha CCD, kuarta ne’e.
Nia mós agradese ba Papa Francisco hamosu dokumentu konaba Fraternidade Humana hodi bele sai hanesan giaun ida atu ema hotu bele moris hamutuk iha toleransia maske diferente relijiaun no fiar.
“Ami agradese ba hamosu dokumentu ba Fraternidade Humana tanbá bele ona sai hanesan giaun ida ba ami oinsa atu moris iha toleransia nia laran, nu’udar musulmanu ida ha’u sente los bensaun ida ne’e,” esplika nia.
Iha oportundiade importante ne’e Ilham Salmin Bin Mahfud hetan oportunidade hodi husu pergunta ida ba Sua Santidade, Papa Francisco nune’e bele husik hela mensajen ida ba juventude sira.
“Hau nia pergunta ba Santo Padre, impaktu husi media sosial atual influensia mal trata no diskrimina malu tanbá ne’e Santo Padre ami presiza ita nia mensajen mai ami joven sira atu bele sai responsavel no bele konstrui ponte no moris kultura toleransia hodi dialogu entre relijiaun nia laran,” nia dehan.
Jornalista : Cidalia Fátima
Editora : Armandina Moniz
