“Ha’u husi Becusse Sentru mai Comoro tanba hakarak simu bensaun husi Amu Papa”
DILI, 11 setembru 2024 (TATOLI) – Ho vizita Santu Padre ka Sua Santidade Papa Francisco, Timoroan hotu hakarak simu bensaun direta, maske la’o do’ok no loron manas.
Esperansa ne’e, akontese ba Inan ida ho idade 87, Maria da Conceição, dehan nia parte husi Becusse-Sentru-Becora ne’ebé tu’ur de’it iha kadeira roda la sente kole mai to’o Comoro, liuliu iha Aeroportu Nicolau Lobato, hodi hetan bensaun ikus husi Sua Santidade Papa Francisco antes husik hela Timor-Leste.
“Ha’u la sente kole, ha’u kontente tebes atu mai simu bensaun husi Amu-Papa, ha’u nia tinan 87,” Inan Maria hateten ba Agência TATOLI iha Comoro, kuarta ne’e.
Nia dehan, vizita Papa iha Timor-Leste hanesan milagre domin nian no husu ema hotu tenke fó domin ba malu.
“Ne’e hanesan milagre domin nian mai ita, ita tenke hadomi malu iha ita rain,” nia dehan.
Sura oras Papa Francisco sei husi Timor-Leste Inan Maria agradese ba diak tomak Papa husik hela liu hosi bensaun.
Maria konta, asli hosi Munisípiu Ainaro maibé hela kleur iha Dili Becusse.
“Ami husi Ainaro, maibé ha’u hela kleur iha Dili, ha’u mai Dili hau nia tinan 17, iha Becusse to’o agora,” nia hakotu.
Inan Maria mai hosi Becusse to’o Comoro akompaiña husi nia beioan sira.
Tuir observasaun TATOLI iha rotunda aeroportu Comoro srani sira okupa hotu estrada hodi hein bensaun ikus husi Santu Padre.
Iha aeroportu hetan seguransa másimu hosi Polisia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).
Jornalista: Hortencio Sanchez
Editor: Florencio Miranda Ximenes
