DILI, 11 setembru 2024 (TATOLI)—Líder másimu Igreja Katólika mundiál, Papa Francisco, halo ona vizita apostólika ba Timor-Leste, hahú loron 09 to’o 11 setembru, nune’e iha minutu ikus Papa atu husik Timor, sarani sira entusiazmu hein iha dalan ninin hodi bele hetan bensaun.
Sarani katólika, Emília Artimigia Belo, hateten, nu’udar foin-sa’e sente kontente tanba konsidera Papa Francisco nia vizita ne’e hanorin sarani-sira hodi hametin fiar.
“Iha vizita Papa Francisco ne’e, buat foun ne’ebé ha’u haree husi nia mak simplisidade, ne’ebé hanorin ita oinsá moris ne’e haree malu di’ak, labele hakanek ema maibé importante mak nia vizita ne’e husu oinsá ita hametin ita-nia fiar nu’udar sarani katólika,” Emília Artimigia Belo, hato’o ba Agência Tatoli, iha Ai-mutin, kuarta ne’e.
Nia tau esperansa ba foin-sa’e sira atu muda mentalidade hodi kria dame iha país laran.
“Tanba ita mak futuru dezenvolvimentu nasaun nian, ha’u-nia esperansa ba nasaun, iha vizita Papa ne’e espera ita-nia boot sira hamutuk kria unidade hodi lori nasaun ne’e ba oin,” nia akresenta.
Maski nune’e, Emília sente triste tanba ohin Amu Papa tenke fila ona, nune’e nu’udar sarani nafatin akompaña ho orasaun hodi delegasaun sira nia viajen ne’e bele la’o ho di’ak to’o Vatikanu.
Notísia relevante : Papa Francisco husik ona Timor-Leste ho Aero Dili
Iha sorin seluk, Sarani husi Parókia Katedrál, Lindo Pinto, sente kontente tanba hetan oportunidade hasoru Amu Papa, ne’ebé hanesan ulun-boot Kreda Universál, bibi-atan boot, Kristu nia Vigáriu iha mundu, bele hakat mai hodi haree ninia bibi sira (sarani) no fiar ne’e sai kultura ida ba povu Timor-Leste.
“Orgullu nu’udar timoroan tanba vizita Papa Francisco ne’e nu’udar rekoñesimentu ba ezisténsia Timor-Leste nu’udar nasaun, iha ne’ebé Vatikanu rasik mós hola parte iha luta Timor-Leste liuhusi Papa João Paulo II nia vizita iha tinan 1989. Tanba ne’e, iha nasaun ukun-an ida-ne’e, iha vizita Papa Francisco nian hanesan rekoñesementu nasaun soberanu nune’e mos fó korajen ba povu iha ukun-an ne’e, liu-liu líder sira ukun povu ho di’ak,” nia katak.
Nune’e mós, Joven Emelita Pereira, hateten, nu’udar joven buat ne’ebé atu halo hodi kontribui ba rai ida-ne’e mak hanesan la’o tuir Papa nia mensajen ne’ebé ohin nia ko’alia iha Sentru Konvensaun Dili (CCD, sigla portugés), katak nu’udar foin-sa’e bele halo barullu maibé respeita ema hotu.
“Hanorin ha’u oinsá ha’u joven bele nakar maibé mós tau-an respeita ema hotu no nu’udar sarani katólika bele hametin ha’u-nia fiar iha Maromak,” nia tenik.
Jornalista : Arminda Fonseca
Editora : Julia Chatarina
