DILI, 11 setembru 2024 (TATOLI) – Dadeer ne’e, sarani sira hein ona Papa Francisco iha dalan hodi simu besaun ikus iha Timor-Leste no despede Potífise ne’ebé sei kontinua nia viajen pastorál bá Singapura.
Hafoin nia ajenda ikus hasoru malu ho joven hamutuk rihun 3, iha tuku 09h30 to’o tuku 10h30, iha Sentru Konvensaun Dili (CCD), Papa sei bá iha Aeroportu Internasionál Prezidente Nicolau Lobato, Comoro, hodi tuir serimónia despedida ikus antes kontinua nia destinasasun bá Singapura.
Tanba ne’e, sarani sira balun hein ona iha área Comoro nian, iha rotunda Prezidente Nicolau Lobato, atu simu bensaun antes Papa dezloka bá Singapura.
Sónia da Costa ne’ebé mai hein sedu Sua Santidade ne’e hateten tanba horseik la konsege simu bensaun no la tuir misa.
“Ha’u ho ha’u nia oan mai sedu iha dalan hodi hein Amu Papa, nune’e bele simu bensaun tanba horseik la konsege tuir misa”, Sónia hateten ba Tatoli iha Comoro, ohin.
Nia kontente tebes atu haree direta Papa nia oin no fiar katak vizita Papa nian bele lori pás mai nasaun ne’e. “Ha’u ho ha’u-nia oan haree de’it Sua Santidade hosi karreta laran de’it mós loos ona, importante haree direta. Ha’u fiar vizita Amu Papa mai ita-nia nasaun bele lori pás no dame ba ita timoroan hotu,” nia dehan.
Iha sorin seluk, Arsénio Manuel hateten lakolen atu hein Papa hodi simu bensaun ikus. “Ha’u ho família sira mai iha fatin ne’e atu hein Papa hodi simu bensaun ikus tanba sura oras de’it ona Amu Papa sei husik ona ita hodi hala’o nia viajen bá fali Singapura”, nia realsa.
Tuir observasaun Tatoli, iha área rotunda Comoro tun to’o aeroportu sarani barak, labarik, joven, ferik no katuas la’o ain hodi hakbesik aan ba estrada, balu hahú tau sira-nia kadeira iha tratoár leten hodi hein bensaun ikus hosi Papa Francisco.
Seguransa sira hosi FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) mós halo ona movimentasaun hodi kontrola srani sira atu labele hamriik hodi oukupa estrada laran.
Tuir oráriu, dadeer ne’e Santidade Papa sei hasoru joven sira iha tuku 09:30 no iha 10h45 Papa sei hala’o nia viajen hosi Dili ba Singapura ho aviaun Aero Dili.
Jornalista: Hortencio Sanchez
Editora: Maria Auxiliadora
