DILI, 12 setembru 2024 (TATOLI) – Prezidente Repúblika, José Ramos Horta, apresia no louva jornalista sira, Polisia Nasionál Timor Leste (PNTL), FALINTIL-Forsa Defeza Timor Leste hotu ne’ebé durante ne’e servisu di’ak tebes hodi fó informasaun ba nasionál no internasionál no gatante seguransa kona-ba vizita Sua Santidade Papa Francisco iha Timor-Leste.
“Parabéns ba Radiu Telivizaun Timor-Leste (RTTL) ne’ebé kolabora di’ak loos ho media Vatikanu nian, halo transmisaun direita, maibé televizaun seluk media online seluk hanesan, TATOLI, TVE no seluk tan simu imajen video husi RTTL di’ak loos hodi transmite informasaun di’ak loos ba ita nia povu iha rai laran no rai li’ur kona-ba Amu-Papa nia vizita ida ne’e,” Ramos Horta hateten ba jornalista sira iha Palásiu Prezidensiál Dili, kinta ne’e.
Nia dehan, servisu hotu la’o di’ak tanba kontribuisaun jornalista sira nian másimu tebes no husu jornalista sira atu mantein nafatin profilisionalizmu hodi fó impormasaun ba públiku ho di’ak.
Alende ne’e nia mós agradese ba setór seguransa ne’ebé fó seguransa di’ak tebes durante vizita Papa iha Timor-Leste.
“Setór seguransa mós di’ak tebes, laiha insidente ruma, ha’u fó parabéns ba ita nia Polísia Nasionál Timor-Leste (PNTL), parabéns mós ba ita nia FALINTIL-Forsa Defeza Timor-Leste (F-FDTL) hotu-hotu kolabora di’ak loos ita la haree kilat barabarak, elementu PNTL no F-FDTL iha povu nia le’et para haree hodi garante laiha problema, ida ne’e sira halo duni,” Horta hakotu.
Jornalista: Hortencio Sanchez
Editór: Florencio Miranda Ximenes
