PM Xanana: fé no fraternidade umana tenke sai kultura iha TL
DILI, 12 setembru 2024 (TATOLI) – Primeiru-Ministru (PM),Kay Rala Xanana Gusmão, husu ba povu Timor-Leste hotu atu mantein ho kultura fé no fraternidade umana.
“Durante vizita Papa iha ita nia nasaun buat hotu la’o di’ak tebes, ida ne’e kontribuisaun jovén no povu hotu nian, laiha konflitu no ita asegura atividade ne’e la’o ho susesu, apresia ba imi hotu, ita mantein ho kultura ida ne’e, kultura fé no fraternidade umana,” Xanana hateten ba jornalista sira hafoin remata enkontru ho Prezidente Repúblika José Ramos Horta iha Palásiu Governu Dili, kinta ne’e.
Nu’udar Xefe Governu orgullu ho maturidade joven sira nian ne’ebé kontribui ona pás durante eventu boot rua iha Timor-Leste la’o ho susesu hanesan, tinan 25 konsulta populár 30 de agostu no loron tolu Sua Santidade vizita Timor-Leste.
“Bainhira ita nia rain hakmatek hanesan ne’e, ita bele hatudu ona ba mandu katak Timor-Leste nasaun ida ne’ebé ka’er metin pás, kaer metin domin no ka’er metin espíritu labele iha violensia atu nune’e ita hamutuk la’o ba oin,” nia tenik.
Tanba ne’e, nia husu ba joven hotu, bainhira iha problema tenke ko’alia ba malu ho didi’ak, la’ós violensia mak solusaun maibé rezolve ho kakutak malirin nu’udar timoroan.
“Bainhira ita nia rai hakmatek hanesan ne’e ba oin mak ita nia rai ne’e bele dezenvolve ba oin, mai ami Governu bele hala’o servisu kria empregu ba joven sira, hanesan Papa mós dehan tenke fó empregu, maibé buat sira ne’e hotu knar no dever Governu nian,” nia dehan.
Jornalista: Hortencio Sanchez
Editór: Florencio Miranda Ximenes
