DILI, 13 setembru 2024 (TATOLI) – Prezidente Parlamentu Nasionál (PPN) Maria Fernanda Lay hateten, intervensaun Sekretáriu Estadu Asuntu Toponímia Organizasaun Urbana (SEATOU) halo ba vendedór ambulante sira iha kapitál Dili liu ona limitasaun ne’ebé lei fó ne’e.
“SEATOU nia intervensaun mak dala ruma hakat liu limite sira balu, maibé ha’u fiar Primeiru-Ministru fó ona atensaun katak SEATOU mós membru Governu no ami hanesan reprezentante povu tenke tau matan ba ida ne’e,” PPN ne’e hateten ba jornalista sira iha Palásiu Prezidensiál Dili, sesta ne’e.
Maibé, Nia dehan, vendedór sira mós labele faan sasan iha estrada públiku liuliu tratoar leten ne’ebé halo ba ema atu la’o ain.
“Mais vendedór sira labele ba faan bebeik sasan iha estrada públiku ne’ebé ema la’o ain sira movimentu, bele lori sira nia sasan ba fan iha fatin ne’ebé Governu prepara ona, ne’ebé iha asuntu barak ita tenke tau iha konsiderasaun,” nia dehan.
Líder Parlamentu Nasionál ne’e dehan tan, “se hakarak halo merkadu kiik-kiik atu besik liu ba populasaun hodi ba sosa laiha problema mais labele ba taka dalan públiku hodi faan sasan iha ne’eba, satan iha momentu prevensaun ba Papa Francisco nia vizita, hamoos tiha ita ba halo foer fali ida ne’e mak la loos.”
Tuir nia, ho deklarasaun ne’e la’ós la defende povu, maibé intervenssun SEATOU nian bazeia ba lei atu ordena Dili sai mós no furak.
“La’ós katak ha’u la defende povu, mais defende bainhira loos. SEATOU mós iha lei mak halo buat sira ne’e, se lei ladun loos ha’u fiar katak Primeiru-Ministru mós tau matan ba ida ne’e no ida ne’e preokupasaun ita hotu nian,” nia hakotu.
Jornalista: Hortencio Sanchez
Editór: Florencio Miranda Ximenes
