DILI, 13 setembru 2024 (TATOLI) – Sekretáriu Estadu Arte no Kultura (SEAK), Jorge Soares Cristovão, informa, tempu besik sei loke hikas fali konkursu ba konstrusaun bioblioteka nasionál ne’ebé planeia ona tinan barak seidauk realiza.
“SEAK hamutuk ho Autoridade Nasionál Petróleu (ANP), no ENI empreza husi nasaun Italia, diskute hela prosesu konstrusaun ba Biblioteka Nasionál ne’ebé mak iha tempu badak sei realiza nia prosesu konkursu ,” Sekretáriu Estadu ne’e hateten ba jornalista sira iha edifisiu Ministériu Juventude, Desportu, Arte no Kultura (MJDAK) Dili, sesta ne’e.
Durante enkontru parte tolu ko’alia mós kona-ba funding agreement ida ne’ebé mak entre ENI ho ANP no Memorandu of Understanding (MoU) no hetan ona nia solusaun.
“Iha tinan ida ne’e nia laran antes dezembru prosesu konkursu ne’e sei ramata, no sei asina kontratu ho manán na’in sira ba projetu ida-ne’e,” nia afirma.
Nia dehan, dezeñu ba konstrusaun ne’e laiha mudansa no mantein ho dezeñu ne’ebé Governu anterior halo ona.
“Dezeñu kuaze ita la halo mudansa, maibé ita haree rai ne’ebé maka iha fatin konstrusaun ba biblioteka ita hakarak hasa’e hanesan tiha ho Edifísiu ADN nian ne’ebé mak iha oin, tanba antes liu nia tun fali mai kraik uituan, maibe tékniku sira ajusta atu halo hanesan tiha, tanba ne’e maka nia iha mudansa uituan, ho orsamentu tanba ne’e mak ohin ita diskute hodi aprova ida ne’e,” nia afirma.
Orsamentu ba konstrusaun biblioteka ne’e millaun $10 mai hosi ENI, bainhira konstrusaun la’o, presiza adisionál Governu mak sei responsabiliza no aumenta millaun $3.5.
Iha fatin hanesan, Prezidente ANP, Gualdino da Silva, hateten, konkordansia ne’ebé iha tau konfiansa ba ANP atu jere no administra prosesu konkursu .
“Ami iha konkordansia ne’ebé mak iha husi parte hotu, fó fiar ba ANP atu jere adminstra prosesu konkursu ne’e hotu, nune’e mós implementasaun iha futuru, no orientasaun depois iha mós ekipa konjunta iha nível tékniku atu haree ba implementasaun tomak, hahú husi prosesu konkursu to’o iha monitorizasaun ba konstrusaun ninian,” Gualdino hateten.
Gualdino dehan tan, “ita adota iha konsultasaun ne’ebé mak rigorozu tebes ho Sentru Nasionál Aprovizionamentu (CNA-sigla portugés) no-mós Ministériu Obra Públiku (MOP), atu nune’e tuir hotu padraun ne’ebé mak vigora ona iha ita nia rain, nune’e fo sai karik bele reprezenta hotu ona padraun ne’ebé mak vigora ona”, nia promete.
Jornalista: Hortencio Sanchez
Editór: Florencio Miranda Ximenes
