DILI, 18 setembru 2024 (TATOLI) – Diretór Jerál Servisu Korportivu iha Ministériu Saúde, Valentino Lisboa Marçal, hateten Ministériu Saúde, iha 2025, harii ospitál jerál iha Munisípiu Manufahi, Ermera no Dili.
“Iha tinan 2025, tuir planu ne’ebé mak ami hetan aprovasaun orsamentu husi CRO, ita hetan tan orsamentu maizmenus rihun $700 hodi halo reabilitasaun no kontrusaun ba postu saúde no sentru saúde sira inklui harii ospitál jerál iha munisípiu Manufahi, Ermera no Dili”, Valentino informa ba TATOLI iha nia kna’ar fatin MS, Caicoli, ohin.
Nia akresenta, ospitál tolu ne’ebé mak atu harii, ekipa enjinaria tun ona ba terenu hodi halo levantamentu ba rai, iha Manufahi (ospital jerál ida), Ermera (ospitál jeral ida ho psikiatria nian ida) no Dili (ospitál jerál ida).
“Ami-nia ekipa sira tun ona ba terenu hodi halo levantamentu ba rai, nune’e tinan oin ita halo konstrusaun ba ospitál tolu tanba ita-nia orsamentu mós aprova ona, agora iha Manufahi ospitál jerál ida, iha Ermera ospitál jerál ida ho psikiatria nian ida, depois Dili ospitál jerál ida ne’ebé mak atu konstrui iha eis merkadu Comoro nian”, nia dehan.
Tuir programa Nonu Governu Konstituisionál katak sidadaun hotu iha direitu ba saúde no asisténsia médika no sanitária no mós iha devér atu defende no promove saúde. Tuir Konstituisaun Repúblika, Estadu tenke promove kriasaun husi servisu nasionál saúde ida ne’ebé universál, jerál, karik bele, gratuitua(ka laselu).
Governu sei kontinua implementa Polítika Nasionál Saúde nian ho Planu Estratéjiku Nasionál Setór Saúde 2011-2030 (PENSS 2011-2030), hodi mantein vizaun kona-ba “Timor-Leste ne’ebé saudavel”, iha ne’ebé timoroan hotu-hotu bele iha asesu ba saúde no, iha ne’ebé, saúde sai hanesan fatór dezenvolvimentu globál, ba luta hasoru pobreza ka moris-kiak.
Inisiativa sira Governu nian kona-ba Setór Saúde sei kontinua orienta atu masimiza esforsu tomak, hodi garante prestasaun servisu ne’ebé di’ak liu, iha setór ida-ne’e no mós jeneraliza (ka habelar) asesu ba kuidadu saúde sira ho kualidade no halo avaliasaun beibeik kona-ba efisiénsia, transparénsia ho profisionalizmu, iha jestaun rekursu finanseiru, umanu, materiál no lojístiku, infraestrutura ho ekipamentu sira.
Jornalista : Felicidade Ximenes
Editór : Zezito Silva
