BAUCAU, 19 setembru 2024 (TATOLI) – Deskonfia ema deskoñesidu foti na’ok materiál projetu hanesan simente husi Programa Nasionál Dezenvolvementu Suku (PNDS) iha suku Uai-oli, postu administrativu Venilale, munisípiu Baucau.
Xefe suku Uai-Oli, Doadven da Cruz Ximenes, esplika, materiál lakon simente hamutuk saka-14 ne’ebé parte husi projetu faze datoluk siklu lima hodi reabilita estrada rurál husi sede suku Uai-Oli ba aldeia Uaihaa tanba kondisan aat.
“Simentu ne’e lakon iha loron-09 setembru madrugada hamutuk saka 14 iha área Uatumisa nian,” Xefe Suku Uai-Oli hateten liuhosi telefonika, kinta ne’e.
Autoridade suku hamutuk ho eskuadra Polísia Nasionál Timor-Leste (PNTL) Venilale identifika no suspeita ona autór na’in-tolu ho inisiál ES, ADS no ZV ne’ebé iha evidénsia hanesan simentu iha rezidénsia ES.
Ximenes, espresa nu’udar Autoridade sente triste tanba atividade PNDS liuhusi programa reabilitasaun estrada iha área referida fó benefísiu ba komunidade maibé mosu situasaun ne’ebé la espera.
“Ita aprosima ona kolega na’in-tolu atu rezolve tuir Lei tradisionál,” nia akresenta
Autoridade planea sei buka solusaun ba problema referida liuhusi prosesu hanesan rezolve tuir kulturál ne’ebé antes ne’e halo ona tara-bandu ba autór na’in-tolu ne’ebé deskonfia ona autór na’in-tolu referida.
Jornalista : Natalino Belo
Editór : Evaristo Soares Martins
