Ministériu Públiku halibur dadus ba antigu deputadu ladauk entrega karreta prado
DILI, 24 setembru 2024 (TATOLI) – Prokuradór Jerál Repúblika (PGR), Alfonso Lopez, hateten, Ministériu Públiku simu ona keixa husi Parlamentu Nasionál kona-ba antigu deputadu sira ne’ebé seidauk hatama karreta Estadu ho marka 88.
“Sim, Ministériu Públiku simu duni ona keixa ida husi Parlamentu Nasionál kona-ba eis-deputadu ne’ebé ladauk fo fila karreta Estadu. Agora kazu ne’e iha andamentu Ministériu Públiku halibur hela dadus no bolu ona sira, atu hato’o dadus ba Prokuradór Titulár ne’ebé kaer kazu ne’e. Husu ba Konsellu Administrasaun Parlamentu Nasionál no husu atu Konsellu Administrasaun Parlamentu tenke kontribui dadus kona-ba ida”, Alfonso Lopez hateten ba jornalista sira bainhira partisipa semináriu nasionál kona-ba rai ne’ebé organiza husi Ministériu Justisa ne’ebé halao iha salaun CNE, Colmera, tersa, ohin.
Nia dehan, Parlamentu Nasionál Presiza kolabora ho Ministériu Públiku hodi aselera kazu ida-ne’e.
“Sira iha Konsellu Adminiatrasaun Parlamentu bele kolabora hodi fó sira-nia sasin loloos ba serbisu kontensiozu sira, ita Prokuradór bele finaliza lalais kazu nee”, nia adianta.
Alfonso hateten, kazu ida ne’e sei iha hela faze halibur dokumentu no análize ba dokumentu sira.
“Ba kazu ida-ne’e, ita presiza halibur dadus, halo análize ba dadus sira, tanba ne’e husu ba Konsellu Administrasaun tenke koopera ho Prokuradór atu nesesita dadus sira ne’ebé liga ba kazu ne’e”, nia konklui.
Notísia relevante : PPN keixa antigu deputadu 35 ne’ebé la entrega karreta ba PJR
Jornalista: Natalino Costa
Editór : Zezito Silva
