Na’in-lima konkore ona ba kargu adjuntu komisáriu

DILI, 25 setembru 2024 (TATOLI) – Komisáriu Komisaun Anti-Korrupasaun (CAC, sigla portugés), Rui Pereira dos Santos, subliña kandidatu na’in-lima mak submete sira-nia aplikasaun Kuríkulum Vitae ba CAC, hodi konkore ba kargu Adjuntu Komisáriu.

“Sim, iha ema na’in-lima mak submete ona sira-nia dokumentu mai ha’u-nia fatin. Agora daudaun sira-nia CV iha hela ha’u-nia meza. Ha’u sei haree didi’ak molok ha’u halo nomeasaun”, Rui dos Santos hateten ba jornalista iha nia kna’ar fatin CAC Farol, kuarta, ohin.

Nia dehan, Komisáriu CAC, tuir lei, nomeia husi Governu no Parlamentu Nasionál mak hili,  maibé Adjuntu Komisáriu ne’e, Komisáriu mak uza nia kompeténsia atu hili.

Rui hateten, Adjuntu Komisáriu kompostu husi ema nai’in-tolu, ida sei haree ba área investigasaun, ida sei haree ba prevensaun no ida seluk sei haree ba boa governasaun.

“Tanba ne’e ita se’i haree didi’ak, sei tais, nia bele mai servisu ho komisáriu ka lae, ho diretór sira iha ne’e ka lae, buat sira hotu mak ita sei haree, molok ita halo nomeasaun”, nia konklui.

Jornalista: Natalino Costa

Editór : Zezito Silva