DILI, 26 setembru 2024 (TATOLI) – Ministru Justisa Sergio Hornai, hateten planu ba konstrusaun sentru juvenil, atualmente, iha faze dezeñu Bill of Quantity (BoQ).
“Ha’u atu hateten katak prosesu ba konstrusaun ba sentru juvenil ne’e lao hela. Progresu ba ida- ne’e, agora daudaun ita tama ona iha faze dezeñu. Ekipa tékniku Ministériu Justisa halo enkontru ho Komisaun Nasionál aprovizionamentu hodi koalia kona-ba dezeñu ida-ne’e no iha faze BoQ, molok tama ba faze konstrusaun”, Sergio Hornai hateten, ba jornalista iha nia kna’ar fatin Colmera, kinta, ohin.
Empreza ne’ebé mak atu kaer obra ne’e, ministru hatan katak la lembra empreza ida ne’ebé mak Ministériu Justisa atu fó fiar hodi dezeña Sentru Juvenil ne’e.
“Bom, ha’u lalembra empreza ida ne’ebé mak dezeña maibé ha’u atu dehan de’it katak ba instalasaun sentru juvenil ne’e dezeñu iha hotu ona, agora atu ba faze implementasaun”, nia adianta.
Governante ne’e subliña, orsamentu ba konstrusaun sentru juvenil, besik millaun ida-resin.
“Konstrusaun sentru juvenil ne’e nudar programa husi antigu Ministru Justisa Amandio de Sa Benevides (matebian) nian, agora ita kompromete tenke kontinua, tanba ne’e Governu konsidera ida nudar planu multi-anual”, nia afirma.
Hornai hateten, Governu matein rai iha área Tibar, Munisipiu Liquiça nudar fatin ba futuru instalasaun sentru juvenil.
“Neste momentu ita-nia tékniku sira halo ona identifikasaun iha terenu, kona-ba konstrusaun sentru juvenil, ita nafatin hili rai iha área Tibar ba konstrusaun Sentru Juvenil. Ba ida-ne’e tékniku sira aprezenta ona mai ha’u. Sira breafing buat balun ba ha’u no ita mantein nafatin fatin ne’e”, nia konklui.
Jornalista : Natalino Costa
Editór : Zezito Silva
