Kartaun UnionPay prodús iha Portugal
DILI, 27 setembru 2024 (TATOLI)—Banku Nasionál Komérsiu Timor-Leste (BNCTL, sigla portugés) lansa ona sistema pagamentu uza kartaun UnionPay International (UPI) iha 20 setembru 2024, ne’ebé imprensaun kartaun iha Portugal tanba daudaun laiha mákina rasik.
“Ami haruka dadus kliente liuhusi internet no hafoin sei prodús no haruka ba Timor-Leste liuhusi aviaun no nia durasaun liu semana ida. Kartaun ne’e la hanesan ho kartaun Atomatic Teller Machine (ATM) ne’ebé baibain ami halo impresaun,” Prezidente Komisaun Ezekutivu BNCTL, António Francisco Vitor, informa ba Agência Tatoli, iha sukursál Mandarin, sesta ne’e.
Jerente banku dehan, daudaun ne’e BNCTL halo hela esforsu atu mákina imprensaun bele iha Timor-Leste, nune’e prosesu imprensaun bele lais liután.
“Ita sei koko atu halo ida-ne’e iha rai-li’ur tanba se ita iha ona mákina ne’ebé ita bele halo iha ne’e, ita sei sosa mákina ne’e,” nia akresenta.
Notísia relevante : BNCTL inaugura unidade foun iha INSS
Prezidente Komisaun Ezekutivu BNCTL informa, taxa servisu UPI nian sei hanesan nafatin ho kartaun débitu regulár, hanesan mákina ATM hodi halo verifikasaun ba balansu iha rai-laran no rai-li’ur ho kustu $0,15.
Aleinde ne’e, ba levantamentu osan iha rai-laran $0,25 no iha rai-li’ur $5 ba pagamentu iha Point of Sales (POS) iha rai-laran no iha rai-li’ur inklui pagamentu online ho kustu $0,15.
BNCTL hahú lansamentu halo ona impresaun ba kartaun UPI hamutuk 299 no to’o 26 setembru 2024, iha kartaun UPI hamutuk 442 iha prosesu produsaun ho valór $4 ba kada kartaun foun no $2 ba sira ne’ebé hakarak renova sira-nia kartaun.
“Folin ba fábrika nafatin hanesan maibé ba UnionPay nian tenke sai uluk ami-nia kliente. Ema barak mai atu halo kartaun UnionPay. Ami iha ona kartaun liu 200 ba funsionáriu BNCTL sira hanesan parte teste no ami mós fó kartaun sira-ne’e espesífiku ba ami-nia kliente sira ba kategoria VIP,” nia tenik.
Biban ne’e, nia husu ba públiku atu labele kompreende sala lansamentu UnionPay iha BNCTL tanba kartaun UPI ne’e benefisia de’it ba sira ne’ebé hakarak halo viajen ba rai-li’ur.
BNCTL ho kartaun UPI fasilita kliente halo transasaun ho lalais no seguru, tanba iha instalasaun POS hamutuk millaun 70, iha ATM hamutuk millaun 3 iha nasaun 183 iha mundu.
Kartaun UnionPay nu’udar sistema pagamentu boot ida iha mundu, ne’ebé halo ho mákina espesiál ne’ebé dezeña atu prodús kartaun plástiku ho padraun seguransa ne’ebé a’as.
Kartaun ne’e iha forma fíziku hanesan ho kartaun kréditu no débitu sira seluk. Dezeñu oin inklui ho logotipu UnionPay, naran banku ne’ebé emite kartaun, númeru kartaun (16 díjitu), nomós data expira. Dezeñu kotuk iha magnétiku ho kódigu Cart Verification Value (CVV).
Jornalista : Osória Marques
Editora : Julia Chatarina
