Rekluzu ida mate iha Prizaun Becora hafoin halo tratamentu
DILI, 27 setembru 2024 ( TATOLI) – Ministru Justisa, Sergio Hornai, simu informasaun husi Diretór Polítika Justisa no Diretór Estabelesimentu Prisionál, Prizaun Becora katak iha prizioneiru ida ho naran Pascoal da Silva hakotu iis hafoin halo traramentu iha Sentru Saúde Becora.
“Bom, ha’u foin lalais mak hetan informasaun husi ha’u-nia Diretór Jerál Polítika Justisa no Diretór Servisu Estabelesimentu Prizionál sira, informa mai ha’u katak ita-nia rekluzu ida mate ho naran Pascoal da Silva”, Sergio Hornai, hateten ba jornalista sira iha nia kna’ar fatin Colmera, sesta nee.
Governante ne’e hateten, bazeia ba informasaun ne’ebé iha katak Pascoal sente mal dispospto no fuan moras iha kuarta (25/9) no nia husu ba gruada prizionál sira atu ba halo traramentu iha sentru saúde ne’ebé besik. Iha ámbitu ne’e, guarda prizionál sira fó asisténsia primeiru sokoru hodi akompaña no lori dadur ne’e ba Sentru Saúde Becora hodi hetan tratamentu no rezultadu teste, prizioneiru ne’e laiha buat ida.
“Ho nune’e sira fali mai prizaun maibé iha horseik 26 setembru nia sente mal fali no fuan moras, entaun ita-nia guarda sira lori halai fali ita-nia rekluzu ba Sentru Saúde Becora no iha oras tuku rua koraik nia hakotu nia iis”, nia esplika.
Ministru Hornai haktuir, matebian Pascoal da Silva, antes ne’e, Tribunal kondena ho pena prizaun efetivu tinan hitu tanba komete kazu balun.
“Matebian tama prizaun iha marsu foin daudaun ne’e ba prosesu balun iha Tribunal”, nia afirma.
Ministru lori funsionáriu Ministériu Justisa no família hato’o sentidu pésames ba família matebian Pascoal.
“Hanesan Ministru Justisa ita lakon timoroan ida, ita lakon família ida iha prizaun. Ita hato’o sentidu kondolénsia ba Pascoal, ba família, ita reja ba matebian hodi nain haraik fatin rohan laek no família forsa no korajen nafatin”, nia dehan.
Nia desmente ho informasaun ne’ebé hateten Pascoal mate ona iha Prizaun Becora laran mak gruada prizioneiru sira lori ba Sentru Saúde Becora hodi halo tratamentu.
“Bom, ida-ne’e ha’u seidauk hetan informasaun ba ida hanesan ne’e. Maibé ha’u atu hateten de’it katak desde ita nia rekluzu ne’e moras, Ita-nia guarda sira halo kedan primeiru sokoru ba nia”, nia haktuir.
Hornai orienta ba Diretór Jerál no Diretór Nasionál sira atu halo akompanamentu ba matebian Pascoal nia funebre tuir kompeténsia Ministériu Justisa ne’ebe previstu iha lei.
Jornalista : Natalino Costa
Editór : Zezito Silva
