DILI, 02 outubru 2024 (TATOLI) – Defeza husi José dos Santos ‘Naimori Bucar’, Advogadu Privadu, Ismael Assunção, hateten Ministériu Públiku arkiva ona kazu obstrusaun autoridade ne’ebé envolve husi lider supremu Partidu Kmanek Haburas Unidade Nasionál Timoroan (KHUNTO).
Nia esplika, Ministériu Públiku arkiva krime obstrusaun autoridade ne’e tanba hafoin Ministériu Públiki halibur tiha provas no fatu sira, husi nia kliente Naimori no mós sasin sira ne’ebé sai hanesan interveniente ba prosesu ne’ebá, Ministériu Públiku halo análize ba prova sira ne’e hotu hodi entende katak la priénse ba elementu krime ne’ebé mak iha hodi avansa ba akuzasaun. Tanba ne’e Ministériu Públiku deside arkiva tiha kazu obstrusaun autoridade ne’ebé envolve husi Naimori iha tinan kotuk.
“Ministériu Públiku deside arkiva tiha kazu obstrusaun autoridade ne’e, tanba depoizde Ministériu Públiku rona tiha arguidu sira, sasin sira no fim, Ministériu Públiku entende katak laiha provas, entaun laiha nesesáriu atu halo akuzasaun ho nune’e mak deside arkiva tiha prosesu ne’e”, Ismael hateten ba TATOLI via telefone kuarta ne’e.
Ismael hateten, desizaun Ministériu Públiku ne’e sai iha sesta (27/9 ) foin lalais ne’e.
“Desizaun ne’e sai iha dia 27 setembru2024, hafoin Ministériu Públiku notifika tiha kedan ha’u hanesan Defeza no ha’u nia kliente señor Naimori hateten katak kazu obstrusaun autoridade ne’ebé envolve husi ami-nia kliente José dos Santos, Ministériu Públiku deside arkiva ona”, nia konklui.
Jornalista: Natalino Costa
Editór : Zezito Silva
