Suspeitu ida tenta atu tara aan iha sela detensaun Eskuadra Na’in-Feto
DILI, 03 outubru 2024 (TATOLI) – Komandante Polísia Nasionál Timor-Leste (PNTL), Munisípiu Dili, Superintendente Xefe Polísia, Orlando Gomes, dehan suspeitu ida ho inisiál S tenta atu tara aan iha sela detensaun eskuadra Na’in-Feto iha kuarta (3/10) horikalan.
Orlando esplika sidadaun ho inisiál S, nudar Guarda Munisípiu Dili ne’ebé destaka Merkadu Taibesi. PNTL halo detensaun ba sidadaun referida, tanba iha kuarta (3/10) horseik suspeitu S ho kondisaun lanu hodi baku rahun hotu negosiante sira-nia modo iha merkadu Taibesi.
Ho hahalok suspeitu nian, negosiante sira hato’o keixa ba Komandu PNTL Dili no Polísia halo kedan detensaun ba suspeitu S.
Iha kuarta (3/10) kalan, bainhira suspeitu ne’e iha sela detensaun Nain-Feto, suspeitu tenta atu tara aan ho nia ropa ne’ebé nia hatais, maibé nia hahalok ne’e polísia konsege deteta no transfere kedan suspeitu ne’e mai fali iha sela detensaun Eskuadra Dom Aleixo.
“Horseik polísia detein suspeitu ida ho insiál S, nia nudar guarda Munisípiu Dili ne’ebé servisu iha merkadu Taibesi. Los duni katak suspeitu ho kondisaun lanu hodi estrada nesgosiante sira-nia modo. Suspeitu nia asaun ne’e laos dala ida-ne’e de’it, maibé bebeik ona, kuadu nia lanu sempre ba ameasa negosiante sira. Entaun haree ba ida-ne’e negosiante sira mak horseik hato’o keixa ba polísia. Ita ba asegura hodi halo prosesu ba nia. Agora ita halo ona detensaun ba susupeitu ne’e oras 72 molok aprezenta ba Ministériu Públiku”, Orlando hateten ba jornalista sira iha nia kna’ar fatin Fatuhada, Dili.
Orlando hateten, maibé iha kuarta kalan suspeitu ne’e tenta atu tara aan iha sela laran.
“Horikalan los duni katak suspeitu ne’e tenta atu tara aan iha sela detensaun laran. Maibé nia asaun la konsege, tanba ita-nia membru polísia ne’ebé momentu ne’e fó seguransa ba sela detesaun ne’e sempre kontrola nia hela de’it, entaun suspeitu la konsege halo asaun ne’e. Agora suspeitu ne’e ita transfere husi sela eskudra Nain-Feto mai ona sela eskudara Dom Aleixo hodi kontinua kumpre detensaun oras 72”, nia hakotu.
Jornalista: Natalino Costa
Editór : Zezito Silva
