MCI-KFP fó posse ba dirijente na’in-rua
DILI, 07 outubru 2024 (TATOLI) – Ministériu Komérsiu no Indústria (MCI) hamutuk ho Komisaun Funsaun Públika (KFP) fó posse na Diretór Unidade Servisu Deskonsentrasaun MCI iha Munisípiu Lautem no Sub-Inspetór Gabinete Auditoria Interna.
“Ohin ita fó tomada posse ida ba sub-inspetór ba gabinete interna no ida seluk ba diretór munisípiu Lautem ne’ebé mak ohin ne’e ita kompleta ona estruturalmente ba opozisaun sira ne’ebé mak ita hatúr bazeia ba orgánika MCI nian”, Ministru Komérsiu no Indústria Filipus Nino Pereira, informa iha MCI, Bebora, ohin.
Nia husu ba emposadu na’in-rua atu kumpre sira-nia kompromisu onra hodi hatudu sira-nia prestasaun servisu no kualidade tuir kapasidade ne’ebé mak iha.
“Konfiansa ida-ne’e laos ita fó naran, maibé bazeia ba kapasidade ne’ebé mak sira iha, tanba ne’e mak ita husu nafatin sira servisu ho reponsabilidade no profisionalismu atu asegura servisu hotu ne’ebé mak ita fó ona ba emposadu na’in-rua”, nia afirma.
Iha fatin hanesan, Prezidente Komisaun Funsaun Públika, Agostinho Letêncio de Deus husu ba emposadu sira hodi servisu ho repsonsabilidade iha aktu servisu nian.
“ohin ita boot sira simu ona tomada posse no kompromete katak atu iha loialdade hodi servi interese públiku nian”, Agostinho Letêncio de Deus relata.
Emposadu Cornelis Bareto, hanesan Diretór Unidade Servisu Deskosentradu Ministériu Komérsiu no Indústria iha Munisípiu Lautem agradese tanba hetan fiar husi Ministériu Komérsiu no Indústria.
“Hanesan Joven ida agradese ba Governu tanba fó fiar mai ha’u atu bele servi ita-nia rain, liuliu haree liu ba komunidade indústria sira, oinsá mak bele komunika ho sira hodi fó formasaun atu bele hetan rezultadu ida ne’ebé mak di’ak ba ita-nia sustentabilidade ekonomia iha ita-nia rain”, Cornelis hateten.
Empozsadu Cornelis Bareto hanesan Diretór Unidade Servisu Deskosentradu Ministériu Komérsiu no Indústria iha Munisípiu Lautem no Justinho Belo hanesan Sub-Inspetór Gabinete Auditoria Interna iha Ministériu Komérsiu no Indústria.
Jornalista : Felicidade Ximenes
Editór : Zezito Silva
