BAUCAU, 07 outubru 2024 (TATOLI) – Komandu Polísia Nasionál Timor-Leste (PNTL) munisípiu Baucau identifika joven na’in-haat relasiona ho kazu tá ema iha área Buibau no Uailili, postu administrativu Baucau Vila, munisípiu Baucau.
Komadante PNTL Munisípiu Baucau, Superintendente Xefe Antoninho Mauluta, esplika, kazu referida akontese bainhira vítima ho inisiál ADC idade 19 husi aldeia Samalakuliba, suku Buibau hetan asaltu tá iha liman loos husi autór sira bainhira tuir dalan atu ba hariis purvolta ruku’ 09:00, iha loron-04 outubru.
“Ita deskonfia, horisehik ita bolu kedas na’in-haat hodi halo identifikasaun,” Komandante PNTL Munisípiu Baucau hateten iha Vila Nova, segunda ne’e.
Autor sira kontinua asaun hanesan utiliza motorizada marka vixon iha área Uailili hodi rezulta vitíma inisiál RF idade 19 ne’ebé hetan tá iha parte kanuruk parte kotuk bainhira vítima tuir dalan ba kioske atu kompra sigarru.
PNTL Baucau direita to’o iha lokál akontesimentu hafoin simu informasaun husi komunidade no kontinua evakua vítima sira ba Ospitál Rejionál Eduardo Ximenes (HoREX, sigla portugés) hodi kontinua halo tratamentu.
“Vítima sira nunka hatene buat ida, la’o ba mak ema tá de’it,” Superintendente Xefe Mauluta akresenta.
Autor na’in-haat ne’ebé PNTL Baucau suspeita hanesan, inisiál NWTV idade 17, EDCF 19, NSB 16, inklui inisiál J nu’udar motorizada na’in.
Suspeitu sira detein kumpri 12 oras iha sela komandu munisipál hodi presta ona deklarasaun hodi hein prosesu kontinuasaun iha Ministériu Públiku.
PNTL Baucau mós asegura ona evidénsia hanesan motorizada marka vxion kór mean iha komandu ne’ebé motorizada referida la utiliza sein xapa-matríkula.
Jornalista : Natalino Belo
Editór : Evaristo Soares Martins
