DILI, 08 outubru 2024 (TATOLI) – Governu Japaun liuhusi nia Embaixadór iha Timor-Leste, Kimura Tetsuya, hateten, Japaun prontu nafatin atu apoia Timor-Leste hodi dezenvolve setór agrikultura hodi hasa’e produsaun domestika hodi hamenus importasaun.
“Iha área agrikultura, ita bele serbisu hamutuk hodi hasa’e produsaun domestika, tanba Japaun no Timor-Leste iha buat barak mak similar ka hanesan, ida mak, ita hotu gosta han etu, ami prontu atu tulun Timor-Leste atu ita serbisu hamutuk,” Embaixadór ne’e hateten ba jornalista sira iha edifisiu MNEK, Dili, tersa ne’e.
Durante tinan barak, Governu Japaun nafatin fornese apoiu ba halo natar iha Timor-Leste. Tinan kotuk, projetu ba produsan Hare iha Manatuto no Bobonaro ne’ebé apoiu hosi JICA kompleta ona.
“Ami esforsu atu kontinua projetu ne’e liuhusi fornese asesor ne’ebé sei serbisu besik liu ho Governu Timor-Leste, peritu sira no agrikultores sira,” nia katak.
Tuir nia, timoroan ne’ebé dadaun ne’e estajiu hela iha Japaun kona-ba agrikultura nian ba futuru bele fila mai Timor-Leste hodi implementa sira nia matenek hodi dezenvolve hamutuk setór agrikultura.
“Ami espera katak estajiariu Timoroan sira iha Japaun hamutuk na’in-19 ne’e sei lori fila mai sira nia esperiensia iha seitor agrikultura no kunesimentu hodi kontribui ba estabilidade, kresimentu no prospieridade nasaun furak ida ne’e nian,” nia afirma.
Kontinua apoiu Timor-Leste nia adezaun ba ASEAN
Diplomata Japanez ne’e subliña, Primeiru-Ministru Kay Rala Xanana Gusmão sei halo viajen ba Vientiane Laos hodi observa Simeira ASEAN 2024 no Japaun sei konsistente nafatin apoiu Timor-Leste nia adesaun ba ASEAN iha área kapasitasaun, lori peritu Japaun sira mai, fornese tradusaun ba instrumentu legál, no konvida ofisiál Governu nian atu partisipa iha programa internu sira.
“Hanesan Timor-Leste halo ona progresu di’ak ba objetivu ida ne’e, hau mos determinadu tebes atu kontinua enkoraza kompania sira Japaun nian atu investe iha Timor-Leste, inklui iha área enerjia, ambiente, no fabrikasaun ezemplu, Tsuneishi Shipbuilding iha planu atu konstrui estaleiru iha Timor-Leste, no estajiariu joven Timor-oan sira sei hetan treinamentu iha Japaun relasiona ho enkuadramentu Koperasaun ne’ebe iha,” nia dehan.
Tuir nia, futuru Timor-Leste iha Kaba’as Joven sira nian Japaun hein katak assinatura ba koperasaun sira ne’ebé iha sei haforsa tan talentu joven Timor-Leste nian hodi kontribui ba dezemvolvementu sustentável iha nasaun ne’e.
Jornalista: Hortencio Sanchez
Editór: Florencio Miranda Ximenes
