DILI, 09 setembru 2024 (TATOLI)–Diretór Nasionál Irrigasaun iha Ministériu Agrikultura, Pekuaria, Peska no Floresta (MAPPF), Jacinto Vicente Filipe Gama, hateten diresaun irrigasaun garante agrikultór iha suku Casa hodi asesu irrigasaun bee ba natar hodi bele kuda hare iha tempu udan.
Notísia Relevante:
“Importante mak ne’e natar na’in iha inisiativa rasik atu halo natar ne’e ami apoiu total. Iha natar balun ne’ebé abandona totál agora ativu fali hotu ona. Sira presiza bee, halo proposta liuhusi autoridade lokal ba diresaun jerál munisipiu nian hodi bele atende sira ho mákina pezadu atu atende sira iha kualker momentu, ida-ne’e mak ami halo,” Diretór Nasionál Irrigasaun iha Ministériu Agrikultura, Pekuária, Peska no Floresta ne’e hateten ba Agência Tatoli relasiona ho preokupasaun deputadu sira-nian atu harii barajen hodi salva agrikultór sira-nia natar iha suku Cassa-Ainaro, iha Comoro, kuarta ne’e.
Nia hateten, munisipiu Ainaro iha irrigasaun boot rua no iha irrigasaun kiik hamutuk 36 ne’ebé fornese bee ba agrikultór sira, tanba ne’e se iha nesesidade MAPPF sei halo atendimentu ka responde.
“Hanoin oinsá bee ne’e tama, tanba ita iha mákina pezadu, ami iha responsabilidade. Sira halo hela natar maibé bee-dalan kotu, ami hakarak apoiu sira to’o kolleta hare,” nia dehan.
Diretór ne’e esplika, atendimentu ho kurtu prazu no longu prazu ne’ebé ho objetivu ida atu agrikultór sira bele asesu ba bee hodi halai natar iha époka kuda hare.
Nia dehan, iha munisipiu Ainaro ne’e iha ekipamentu pezadu ida-ne’ebé bele hadi’a no fornese bee ba agrikultor sira hodi halo natar, maibé iha tempu emerjénsia ne’ebé hetan estragu ka nesesidade apoiu ruma, MAPPF iha ekipamentu hamutuk 10 ne’ebé bele halo serbisu movél.
Jornalista : Jesuína Xavier
Editór : Cancio Ximenes
