BAUCAU, 09 outubru 2024 (TATOLI) – Autoridade Protesaun Sivíl (APC, sigla portugés) Munisípiu Baucau liuhusi korpu Bombeiru destaka ona membru hodi kombate inséndiu florestál iha foho Matebian, postu administrativu Quelicai.
Inséndiu referida akontese iha loron-tersa, 08 outubru ne’ebé deskonfia kauza husi ema sunu du’ut no alastra ba foho lolon matebian no kontinua to’o uma komunidade iha postu administrativu Quelicai.
Komandante Operasionál APC Baucau, Francisco Viana Freitas, esplika, membru ne’ebé destaka iha fatin akontesimentu maibé hafoin simu informasaun inséndiu ekipa Bombeiru desloka kedas no halo kombate ba dezastre naturál referida.
“Ami-nia ekipa aranka kedas ba fatin ne’ebá atu kombate inséndiu, maibé dalan laiha entaun sira iha kraik de’it atu asegura komunidade sira-nia uma,” Komandante Operasionál APC Baucau hateten iha Vila Antiga, kuarta ne’e.
Maske ekipa Bombeiru sira prontu to’o iha lokál akontesimentu maibé hasoru difikuldade tanba laiha dalan atu karreta kombate atu asesu to’o iha foho lolon nune’e deside halo prevensaun iha uma komunidade ne’ebé besik fatin akontesimentu.
APC halo maneira hanesan kria koordenasaun ho Polísia Eskuadra Postu Quelicai inklui Autoridade lokál hanesan orienta komunidade sira hodi apoia malu nune’e asegura hodi evita alastra ba uma komunidade sira.
“Komunidade balun baku, maibe ahi sei lakan. Informasaun ahi-haan uma seidauk iha,” Francisco akresenta.
Entertantu, to’o agora APC Baucau seidauk rejista uma komunidade inklui vítima ruma ne’ebé hetan estragus no ema ruma sai vítima husi kazu dezastre naturál inséndiu iha foho Matebian, postu administrativu Quelicai.
Jornalista : Natalino Belo
Editór : Evaristo Soares Martins
