DILI, 10 outubru 2024 (TATOLI) – Governu liuhusi reuniaun Konsellu Ministru (KM) extraordináriu, kinta ne’e, aprova Projetu Dekretu-Lei ne’ebé aprezenta husi Vise-Primeiru-Ministru, Mariano Assanami Sabino, kona-ba Programa abitasaun komunitária.
“Programa ne’e hakarak garante direitu ba abitasaun, nu’udar kondisaun ida ba dezenvolvimentu integradu no sustentável komunidade nian, liuhosi planeamentu no konstrusaun uma rezidensiál sira no ninia respetiva infraestrutura no ekipamentu koletivu komplementár, ne’ebé destinadu ba atribuisaun ba benefisiáriu sira, tuir kritériu sira ne’ebé estabelese ona, no mós apoiu komunidade nian ne’ebé la’o hela tuirmai ba manutensaun no asesu ba servisu sira,” tenik iha nota ne’ebé Agência TATOLI asesu hosi portál Governu.
Implementasaun programa ne’e sei lidera husi Ministériu Dezenvolvimentu Rurál no Habitasaun Komunitária, hamutuk ho administrasaun lokál sira no ho partisipasaun ativu husi komunidade.
“Uma sira ne’e atribui ba benefisiáriu sira tuir sira nia kapasidade finanseira, ne’ebé tama iha rejime ida hosi rejime sira tuirmai: komersiál, subsidiadu, komunitáriu ka sosiál,” refere iha nota ne’e.
Iha rejime komersiál, benefisiáriu selu konsiderasaun ne’ebé define hosi kondisaun merkadu nian.
Tuir rejime subsidiadu, montante ne’ebé atu selu ajusta atu sai baratu liu tanba kondisaun merkadu nian. Tuir rejime komunitáriu, atribuisaun uma nian maka gratuita iha faze inisiál, ho montante ida ne’ebé estabelese atu selu hafoin períodu ida-ne’e.
Jornalista: Hortencio Sanchez
Editór: Florencio Miranda Ximenes
